საქართველოს უსაფრთხოების სამსახურში სსიპ საქართველოს ოპერატიულ-ტექნიკური სააგენტოს უფროსის კანდიდატურაზე კობა კობიძის კანდიდატურა აირჩიეს. ის მანამდე ამავე უწყებაში უფროსის მოადგილის თანამდებობაზე მუშაობდა. საქართველოს კანონმდებლობით, კანდიდატს საქართველოს პრემიერ-მინისტრი დანიშნავს.

კომისიას, რომელმაც კობიძე აირჩია სახელმწიფო უსაფრთხოების სამსახურის უფროსი, ვახტანგ გომელაური ხელმძღვანელობდა. კომისიის წევრები კი იყვნენ: უზენაესი სასამართლოს თავმჯდომარის მოადგილე - მზია თოდუა, პარლამენტის იურიდიულ საკითხთა კომიტეტის თავმჯდომარე - ეკა ბესელია, თავდაცვისა და უშიშროების კომიტეტის თავმჯდომარე - ირაკლი სესიაშვილი, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე - სოფიო კილაძე და საქართველოს მთავრობის საპარლამენტო მდივანი - შალვა თადუმაძე.

როგორც უწყებიდან მიღებული პრესრელიზით ირკვევა, კომისიის წევრებმა სხდომაზე საქართველოს ოპერატიულ-ტექნიკური სააგენტოს უფროსის თანამდებობაზე წარსადგენი სამი კანდიდატურა განიხილეს. კანდიდატები, კობიძის გარდა, იყვნენ: სუს-ის საინფორმაციო-ანალიტიკური დეპარტამენტის დირექტორის მოადგილე - დავით კობახიძე და იუსტიციის სამინისტროს გენერალური ინსპექციის უფროსის მოადგილის მოვალეობის შემსრულებელი ლევან როსტომაშვილი.