მოსკოვი და მინსკი ბელორუსის ტერიტორიაზე ტაქტიკური ბირთვული იარაღის განთავსებაზე შეთანხმდნენ.

რატომ არის მნიშვნელოვანი: ბელარუსი, უკრაინაში სრულმასშტაბიანი ომის დაწყების დღიდან რუსეთის ღია მოკავშირე და სამხედრო პოლიგონია, საიდანაც ოკუპანტები სამხედრო ტექნიკას და პერსონალს ეზიდებიან.

  • კრიტიკოსთა შეფასებით, ამჯერად ბელარუსი რუსეთის ბირთვული ტყვე ხდება, რაც ქვეყნის რუსეთზე დამოკიდებულებას კიდევ უფრო გააღრმავებს.
  • მედიაში გავრცელდა საიდუმლო დოკუმენტები, რომლის მიხედვითაც კრემლს ბელარუსის სახელმწიფოებრიობის შთანთქმის გეგმა თარიღებში აქვს გაწერილი.

გამოხმაურებები: პუტინის მორიგ ბირთვულ სპეკულაციებს უკრაინის მაღალჩინოსნებიც ეხმაურებიან.

  • უკრაინის პრეზიდენტის ოფისის უფროსი მრჩეველი, მიხაილო პოდოლიაკი აცხადებს, რომ ბირთვულ იარაღზე საუბრის განახლება ნიშნავს იმას, რომ პუტინს წაგების ეშინია.
  • "ერთადერთი, რაც მას [პუტინს] შეუძლია გააკეთოს არის ტაქტიკით შეშინება. ამასთან, ის კიდევ ერთხელ ადასტურებს დანაშაულში მონაწილეობას, ბირთვული იარაღის გაუვრცელებლობის ხელშეკრულების დარღვევას", — ამბობს პოდოლიაკი.
  • უკრაინის ეროვნული უსაფრთხოებისა და თავდაცვის საბჭოს მდივნის, ოლექსი დანილოვი ამბობს, რომ ბირთვული ტაქტიკური იარაღის ბელარუსში განთავსება ქვეყანაში დესტაბილიზაციას გამოიწვეს.
  • დანილოვის შეფასებით, რუსეთმა ამ შეთანხმებით ბელარუსი ტყვედ აიყვანა.