ამის შესახებ მათ პეტიცია გაავრცელეს.

რატომ არის მნიშვნელოვანი: საქმე ეხება აქონდროპლაზიის მქონე ბავშვებისთვის სასიცოცხლოდ აუცილებელ მედიკამენტს, რომელიც საქართველოში არ შემოაქვთ.

  • მშობლები ამბობენ, რომ ამის გამო ბავშვებს ჯანმრთელობის უფლება ერთმევათ.

დეტალები: პეტიციის ავტორების თქმით, პასუხისმგებელი უწყებები მათ ერთი წელია, ატყუებენ.

  • "რა ვუთხრათ შვილებს? როგორ ავუხსნათ, რომ ვინაიდან ამ ქვეყანაში დაიბადნენ და არა ევროკავშირის რომელიმე ნებისმიერ ქვეყანაში ან ამერიკის ნებისმიერ შტატში, უნდა განწირულები იყვნენ საკუთარი ქვეყნის მთავრობის მიერ? როგორ ავუხსნათ, რომ თუ მათი მშობლები არ გადაიხვეწებიან სხვა ქვეყანაში ლტოლვილებად, არ წაიყვანენ უცხო ქვეყანაში საკუთარ შვილებს, არ დატოვებენ ჩვენი შვილები მშობლიურ ოჯახებს, საბავშვო ბაღებსა თუ საკლასო ოთახებს და არ იცხოვრებენ უცხო ქვეყნის ლტოლვილთა ბანაკებში, საკუთარი სახელმწიფოს ჯანდაცვა არ აპირებს მათზე ზრუნვას", — ამბობენ მშობლები.

ისინი მიმართავენ ექიმებსა და ჯანდაცვის სისტემის ხელმძღვანელებს, დაეხმარონ მთავრობასთან შუამდგომლობაში და მიაღებინონ მათ პოლიტიკური გადაწყვეტილება.

  • "მოსთხოვეთ, რომ შემოიტანონ აქონდროპლაზიის სამკურნალო მედიკამენტი ვოზორიტიდი. მედიკამენტი, რომელსაც 10 წელი ელოდებოდა მსოფლიო და რომელიც ამჟამად სამკურნალოდ ოფიციალურად წარმატებით გამოიყენება იმ ქვეყნებში, სადაც მედიცინის დონე გაცილებით მაღალია, ვიდრე საქართველოში!
    მედიკამენტი, რომელსაც მინიჭებული აქვს FDA და EMA-ს ოფიციალური ლიცენზიები, რომელიც არის ერთადერთი და უალტერნატივო ეფექტური მედიკამენტი მსოფლიოში".