ამის შესახებ ინფორმაციას ბელარუსის მედია ავრცელებს.

რატომ არის მნიშვნელოვანი: Belta-ს ცნობით, შეხვედრისას აფხაზეთის ე.წ პრეზიდენტმა და ლუკაშენკომ ამგვარი შეხვედრების მნიშვნელობასა და მათი ურთიერთობების გაღრმავებაზე ისაუბრეს.

  • ალექსანდრე ლუკაშენკოს თქმით, ბელორუსი ყოველთვის იყო დაინტერესებული აფხაზეთთან თანამშრომლობით.
  • ლუკაშენკო და ბჟანია ერთმანეთს გასული წლის სექტემბერშიც შეხვდნენ, მაშინ ბელორუსის პრეზიდენტი აფხაზეთში ჩავიდა.

დეტალები: ლუკაშენკოს შეხვედრისას აინტერესებს, რატომ რეაგირებს მწვავედ საქართველოს ხელმძღვანელობა მათ შეხვედრაზე და ამატებს, რომ ადამიანებს შორის თბილი და მეგობრული ურთიერთობა უნდა იყოს.

  • "შესაძლოა, ეს ურთიერთობები დაეხმაროს მშვიდობასა და მეგობრობას აფხაზ და ქართველ ხალხებს შორის. მე და შენ ხომ არასდროს დავგეგმავდით თბილისის წინააღმდეგ რაიმე ქმედებას", — თქვა ლუკაშენკომ.
  • აღნიშნა, რომ დღევანდელი შეხვედრა ძალიან მნიშვნელოვანია ადამიანური თვალსაზრისით და მათი ურთიერთობები უნდა განვითარდეს.
  • "აფხაზი ხალხი პატივს სცემს ბელორუსებს. ბელორუსებსაც იგივე დამოკიდებულება აქვთ. ჩვენ გვაქვს რაღაც, რაზეც უნდა ავაშენოთ ჩვენი ურთიერთობა. არის პროდუქტები, რომლებითაც გვაინტერესებს. ტურიზმიც ბევრს გვპირდება", — თქვა მან.
  • ამბობს, რომ მის ხალხს ზღვაზე წასვლა უნდა, ისვენებდნენ სოხუმში, ბათუმში, თბილისში და ასე შემდეგ თუმცა, რატომღაც, აფხაზეთი ამ პროცესიდან გათიშულია.
  • მისივე თქმით, აფხაზეთი და ბელარუსი გიგანტური სახელმწიფოები არაა, ამიტომ ვერ ხვდება, რატომ არ უნდა იყვნენ ერთად და რატომ არ უნდა შეხვდნენ ერთმანეთს.
  • "ჩვენ გვჭირდება ვიყოთ ერთმანეთთან უფრო ახლოს ამ რთულ დროს. თბილისი, სოხუმი და მინსკი. ჩვენ უნდა ვიმუშაოთ, რომ მოვძებნოთ გზები ერთმანეთისკენ, ვიბრძოლოთ ერთმანეთისთვის", — თქვა ლუკაშენკომ.

ბელარუსის პრეზიდენტმა მიხეილ სააკაშვილზეც ისაუბრა და თქვა, რომ თვალყურს ადევნებს საქართველოში განვითარებულ მოვლენებს.

  • ამბობს, რომ სააკაშვილის მდგომარეობა ნორმალურად არ გამოიყურება, რადგან, ბოლოს და ბოლოს, ის პრეზიდენტი იყო და ასე მოქცევა შეუსაბამოა.
  • განმარტავს, რომ ბელარუსი არ ჩარეულა ამ სიტუაციაში და არც საქართველოში მიმდინარე სხვა პროცესებში.
  • "თბილისთან შეძლებისდაგვარად ძალიან კარგი ურთიერთობა შევინარჩუნეთ", — განაცხადა ლუკაშენკომ.

ასლან ბჟანიამ მადლობა გადაუხადა ბელორუსის სახელმწიფოს მეთაურს მოწვევისა და თანმიმდევრულობისთვის.

  • თქვა, რომ მოუსმინა ბელარუსის პრეზიდენტის აზრებსა და დამოკიდებულებებს, რაც მისთვის მისაღებია.
  • "ვფიქრობ, რომ თქვენი ბრძნული სიტყვა ამ ხალხის გულამდე მიაღწევს", — განაცხადა ბჟანიამ.