განცხადებას შინაგან საქმეთა სამინისტრო ავრცელებს.

რატომ არის მნიშვნელოვანი: 4 თებერვალს, ეროვნულ გალერეაში, კულტურის ცენტრ ათინათის გამოფენის გახსნაზე, მხატვარმა სანდრო სულაბერიძემ საკუთარი ნამუშევარი ჩამოხსნა და მის ნაცვლად, კედელზე დატოვა წარწერა — "ხელოვნება ცოცხალი და დამოუკიდებელია".

  • ფაქტზე შსს-მ გამოძიება ქურდობის მუხლით დაიწყო, რაც სასჯელის სახით 1-დან 2 წლამდე შინაპატიმრობას ან თავისუფლების 3-დან 5 წლამდე აღკვეთას ითვალისწინებს.

უწყების განცხადებით, საქმის ფარგლებში შესაბამისი მოქმედებები ჩატარდა, გამოძიება კი დანაშაულის ნიშნების არარსებობის გამო შეწყდა.

  • გამოძიება სისხლის სამართლის კოდექსის 177-ე მუხლის მე-2 ნაწილით მიმდინარეობდა.

რას ამბობდა მუზეუმი: მათი თქმით, მხატვრის მიერ საგამოფენო დარბაზში კედლის დაზიანებისა და თავისი ნახატის ჩამოხსნის, შეუთანხმებლად გატანის ფაქტის შემდეგ, სოლიდარობის მიზნით, რვა მხატვარმა მოისურვა ექსპოზიციიდან თავიანთი ნამუშევრების ამოღება.

  • რაც კულტურის ცენტრ ATINATI’S-სა და ეროვნულ გალერეას შორის ხელმოწერილი ხელშეკრულების თანახმად, შეუძლებელია.
  • თუმცა მხატვარი შოთა აფციაური ამბობდა, რომ გამოფენამდე არ მოუწერია ხელი არც ერთი იურიდიული დოკუმენტისთვის.

როგორი იყო გამოხმაურებები: სულაბერიძის მხარდასაჭერად 12 თებერვალს აქცია გაიმართა.

  • მომხდარს გამოეხმაურა ახალგაზრდა იურისტთა ასოციაციაც და თქვა, რომ გამოძიების დაწყება ქურდობის მუხლით არასწორია.
  • სულაბერიძის საქმეზე ქურდობის მუხლით გამოძიების დაწყება გააკრიტიკა სალომე ზურაბიშვილმაც.
  • მხარდასაჭერი აქციის შემდეგ კი, რომელსაც ათობით პოლიციელი იცავდა, პრეზიდენტმა დაწერა, რომ პოლიციის 20 მანქანა ცისფერი გალერეის უკანა ეზოში სხვა ეპოქას გვახსენებს და თანამედროვე საქართველოს არცხვენს.
  • "მხატვარი ესოდენ საფრთხეს უქმნიდეს სახელმწიფოს?" — კითხულობდა ის.
  • ზურაბიშვილის პოსტის შემდეგ უწყების გენერალური ინსპექცია პრეზიდენტის სასახლეში შევიდა და იქიდან ნახატები წამოიღო.
  • პროტესტს მხატვარი შოთა აფციაური შეუერთდა ეროვნული გალერეიდან ნამუშევრის გატანა მოითხოვა, მოგვიანებით გამოფენის კურატორმა მხატვრებს უპასუხა, რომ თუ ვინმეს გალერეიდან ნამუშევრების წაღება უნდა, წაიღოს.
  • "მე ვეტყოდი ხელოვანებს, რომ, რა თქმა უნდა, არაფრის არ უნდა შეეშინდეთ იმიტომ, რომ უფრო შორს, ეს ყველაფერი ვერ წავა", — ასე გამოეხმაურა მომხდარს ყოფილი ომბუდსმენი.