"ყველასთვის კარგად არის ცნობილი, რომ დამოუკიდებელი საქართველოს არსებობის ვერც ერთ ეტაპზე ვერ მოხერხდა ძლიერი და დამოუკიდებელი სასამართლო სისტემის ჩამოყალიბება," - სასამართლო სისტემასთან დაკავშირებით სამი პარტია, ევროპული საქართველო, თავისუფალი დემოკრატები და რესპუბლიკური პარტია ერთობლივ განცხადებას ავრცელებს.

განცხადებაში ხაზი აქვს გასმული რუსთავი 2-ის საქმისა და მოსამართლეების დანიშვნის პროცესს. ხელმომწერი პარტიები მიიჩნევენ, რომ სასამართლო სისტემაში შექმნილი მდგომარეობა საგანგაშოა და მოითხოვენ:

  • დროებით, მაგრამ დაუყოვნებლად შეჩერდეს მოსამართლეთა დანიშვნები;
  • სასამართლო ხელისუფლებას ჩამოშორდეს ყველა ის პირი, რომელსაც არ გააჩნია საზოგადოების ნდობა და მიიჩნევიან ხელისუფლების საყრდენად სასამართლო სისტემაზე კონტროლის განხორციელებისთვის, რისთვისაც ამ ადამიანებმა უნდა აიღონ პასუხისმგებლობა საკუთარ წარსულზე და მისცენ ქართულ სასამართლოს გაჯანსაღების, დამოუკიდებლად განვითარების და გაძლიერების შესაძლებლობა;
  • ხელისუფლების, ოპოზიციური პარტიების, არასამთავრობოებისა და ექსპერტების მონაწილეობით შეიქმნას სასამართლო რეფორმაზე მომუშავე ჯგუფი, რომელიც მოამზადებს არსებით რეფორმას, რათა განვითარდეს დამოუკიდებელი სასამართლო სისტემა.