სადავო განცხადება ისრაელის ყოფილმა პრემიერმინისტრმა, ნაფტალი ბენეტმა ადგილობრივ მედიასთან, 4 თებერვალს გააკეთა, დღეს კი უკრაინულ და საერთაშორისო მედიებზე გავრცელდა.

რატომ არის მნიშვნელოვანი: ბენეტი ამტკიცებს, რომ 2022 წლის მარტის დასაწყისში რუსეთში ვლადიმერ პუტინს შეხვდა და ომის შეწყვეტის შესახებ მოლაპარაკებების ორგანიზებას ცდილობდა.

• მისივე ინფორმაციით, შეხვედრაზე პუტინმა დაარწმუნა, რომ უკრაინის პრეზიდენტს არ მოკლავდა, რაც იმ დღესვე ბუნკერში მყოფ ზელენსკის გადასცა.
• ომის დაწყებიდან დღემდე რუსულმა პროპაგანდამ ბევრჯერ გაავრცელა ინფორმაცია თითქოს, ზელენსკი უკრაინიდან გაიქცა და სხვა ქვეყანაში, ბუნკერში წერდა მიმართვებს, მაგრამ ამ პერიოდში ზელენსკი არაერთხელ გამოჩნდა საჯაროდ.
• გარდა ამისა, 3 მარტის სტატიაში The Sunday Times წერდა, რომ ბოლო დღეებში ზელენსკი მკვლელობის სამ მცდელობას გადაურჩა.
• 29 მარტს კი პრეზიდენტის ადმინიტრაციაში ამბობდნენ, რომ რუსი სამხედროები ზელენსკის მოკვლას ისევ ცდილობენ.

ბენეტის თქმით, პუტინმა რამდენჯერმე გაუმეორა, რომ ზელენსკის ლიკვიდაციას არ გეგმავდა — ამ დროისთვის ვრცელდებოდა დაუდასტურებელი ცნობები იმაზეც, რომ ზელენსკი პუტინის #1 სამიზნე იყო.

• "ვიცოდი, რომ ზელენსკის ბუნკერში ემუქრებოდნენ და რომ მათ არ იცოდნენ მისი ადგილსამყოფელი. რაღაც მომენტში პუტინს ვუთხარი: "მისმინე, რა ხდება ამ ამბავთან დაკავშირებით? შენ აპირებ მის მოკვლას?" მან მითხრა: "მე არ მოვკლავ ზელენსკის", — იხსენებს ბენეტი.
• ისრაელის ყოფილი პრემიერი ირწმუნება, რომ კრემლიდან გამოსვლის შემდეგ, აეროპორტის გზიდან დაურეკა ზელენსკის, რომელიც მაშინ "ბუნკერში იჯდა" და პუტინის ნათქვამზე უამბო.
• ამტკიცებს, რომ საუბრიდან ორ საათში უკრაინის პრეზიდენტი თავის კაბინეტში ავიდა და გადაიღო ვიდეო, სადაც თქვა: "მე არ მეშინია".

თუმცა, ომის დაწყების შემდეგ ზელენსკი არაერთხელ გამოჩნდა კიევის ქუჩებში. პირველივე ვიდეო რომელიც, სავარაუდოდ, პრეზიდენტის ადმინისტრაციაში გადაღებული, მან ჯერ კიდევ 24 თებერვალს გაავრცელა.

• მეორე დღეს, 25 თებერვალს კი გამოაქვეყნა ცნობილი ვიდეო "პრეზიდენტ ტუტ", სადაც სამთავრობო გუნდთან ერთად ქალაქის ცენტრში იდგა.
• 26 თებერვალს ქუჩიდან კიდევ ერთი ვიდეო გვაჩვენა, წარწერით "არ დაუჯეროთ ფეიკებს" — ამ დროს ვრცელდებოდა დეზინფორმაცია თითქოს, ის ქვეყნიდან გაიქცა.
• საერთაშორისო მედიაში გავრცელებული ოფიციალური ინფორმაციით, ბენეტი პუტინს მოსკოვში 5 მარტს შეხვდა, შესაბამისად, ვიდეო, რომელზეც ის საუბრობს 5 მარტით თარიღდება.
• ზელენსკის ინსტაგრამ გვერდზე ნამდვილად იძებნება ამ დღეს კაბინეტში გადაღებული ვიდეო.
• თუმცა, უკრაინული მედია წერს, რომ კაბინეტში გადაღებული ის ვიდეო, რომელშიც პრეზიდენტი ამბობს, რომ არავის ეშინია არა 5, არამედ 7 მარტსაა გამოქვეყნებული.

რას ამბობენ უკრაინაში: საგარეო საქმეთა მინისტრმა, დმიტრო კულებამ პუტინს მატყუარა უწოდა.

• "წარსულში პუტინმა პირობა დადო, რომ არ დაიკავებდა ყირიმს, არ დაარღვევდა მინსკის შეთანხმებებს, არ შეიჭრებოდა უკრაინაში, მაგრამ მან ეს ყველაფერი გააკეთა. არ მოგატყუოთ, ის ოსტატი მატყუარაა. ყოველ ჯერზე, როცა ის პირობას დებდა, რომ რაღაცას არ გააკეთებდა, ეს მისი გეგმის ნაწილი იყო", — ამბობს კულება.
• პრეზიდენტის ადმინისტრაციის უფროსის მრჩეველმა, მიხაილო პოდოლიაკმა კი პუტინის სავარაუდო დაპირება ფიქციად შეაფასა.
• "რუსეთის შემოჭრის უკან არ დგას "ნატოს გაფართოება", უსაფრთხოების გარანტიები ან სანქციები, არამედ — რუსეთის ფედერაციის სურვილი, გაანადგუროს უკრაინა და დახოცოს უკრაინელები", — დაწერა მან.