ინფორმაცია ჟურნალისტებმა On.ge-ის თავად დაუდასტურეს.

რატომ არის მნიშვნელოვანი: როგორც ისინი ამბობენ, ტელეკომპანიიდან წასვლას სარედაქციო პოლიტიკასთან არანაირი კავშირი არ აქვს და მიზეზი გახდა მენეჯმენტის დამოკიდებულება გაფიცული ოპერატორების მიმართ.

• ორივე ჟურნალისტის ქმარი გაფიცულებს შორის იყო, თუმცა ქურასბედიანმა და ხიდიშელმა ტელეკომპანია მათ დათხოვნამდე, პროტესტის პირველ დღეს, პირველ თებერვალს დატოვეს.

დეტალები: მარტა ქურასბედიანის განმარტებით, ის, რომ მისი ოჯახის წევრი ამ პროცესში მონაწილეობდა მთავარი მიზეზი არ ყოფილა, თუმცა ერთ-ერთი ფაქტორი იყო.

• "სამართლიანი პროტესტის წინააღმდეგ ხელმძღვანელობამ ცილისმწამებლურ კამპანიას მიმართა, რაც ჩემთვის იყო მიუღებელი და ამიტომ დავტოვე არხი", — ამბობს ქურასბედიანი და განმარტავს, რომ ოპერატორებს გარედან მართულობა დააბრალეს.
• "ეს არ იყო მიზეზი, მოგეხსენებათ, რომ მე მათზე ადრე წამოვედი", — განაცხადა ქეთი ხიდიშელმა.

რა მოხდა ფორმულაში: ტელეკომპანიის ოპერატორებმა 31 იანვარს ხელფასის გაზრდის მოთხოვნით სამსახურებრივი მოვალეობის შესრულებაზე უარი განაცხადეს. ფორმულაში ამბობენ, რომ ისინი დაუყოვნებლივ 500 ლარით მატებას ითხოვდნენ.

• მათივე განცხადებით, ადმინისტრაციის განმარტების მიუხედავად, რომ ახლა მატება შეუძლებელი იყო, ოპერატორებმა აღარ ისურვეს დიალოგის გაგრძელება და მეორე დღიდანვე (1 თებერვლიდან) უარი თქვეს საკუთარი მოვალეობების შესრულებაზე.
• თავად ოპერატორები მედიაჩეკერთან აცხადებდნენ, რომ პრობლემის მოგვარების სანაცვლოდ, მენეჯმენტისგან მიიღეს დამამცირებელი დამოკიდებულება და კატეგორიული უარი პირობების გაუმჯობესებაზე, ამიტომ პროტესტის ფორმად გაფიცვა აირჩიეს.
• ფორმულას იურისტი, ეთო ქათამაძე On.ge-სთან ამბობდა, რომ ე.წ. გაფიცვის შესახებ პოსტფაქტუმ გაიგეს, პროტესტი კი იქამდე გაგრძელდა, სანამ კომპანიას თანამშრომლების შენარჩუნების რესურსი აღმოაჩნდა.

ფორმულას განცხადებით, ოპერატორებმა არ დაიცვეს გაფიცვის გამოცხადების კანონით დადგენილი ვადები და წესი და 3 დღის განმავლობაში უხეშად დაარღვიეს ხელშეკრულებით გათვალისწინებული ვალდებულებები.

• მათივე თქმით, 1-ლი თებერვლიდან 3 თებერვლის ჩათვლით, ადმინისტრაციას ჰქონდა მოლაპარაკების არაერთი მცდელობა.
• "ვთხოვდით, დაბრუნებოდნენ თავიანთ სამუშაო გარემოს, შეესრულებინათ კონტრაქტით დაკისრებული მოვალეობები და ვთავაზობდით ალტერნატივებს. განვუმარტეთ, რომ კომპანიას ამ ეტაპზე არ ჰქონდა ხელფასის ყველასთვის ზრდის საშუალება. თუმცა, შევთავაზეთ, რომ მათ უშუალო ხელმძღვანელთან კომუნიკაციით, ინდივიდუალურად ყოფილიყო განხილული ხელფასის სამომავლოდ მატების საკითხი და კრიტერიუმები", — ვკითხულობთ ფორმულას განცხადებაში.
• ოპერატორები კი ამბობენ, რომ ტელეკომპანიას შესთავაზეს კომპრომისული ვარიანტი, რაც გულისხმობდა ხელფასის მატების რამდენიმე თვეზე გადანაწილებას, თუმცა კომპანიამ ეს შეთავაზება უპასუხოდ დატოვა.
• ფორმულას განცხადებით, ოპერატორები ულტიმატუმზე იდგნენ — გარდა ამისა, როცა ცდილობდნენ გამოძებნილი ოპერატორების მცირე რესურსით ემუშავათ, ბოიკოტის რეჟიმში მყოფები პირადად და სხვა ოპერატორების გავლით უკავშირდებოდნენ გადაღებაზე გასულ თანამშრომლებს და აყენებდნენ შეურაცხყოფას.
• ტელეკომპანიამ 25 ოპერატორი გაათავისუფლა: "ვწუხვართ, რომ პროტესტის ფორმები და შერჩეული დრო ძალიან მძიმედ აისახა ფორმულას ყველა თანამშრომელზე. სამწუხაროა, რომ ოპერატორებმა არც კანონით დადგენილი ვადა დაიცვეს და არც კოლეგიალობა".