ფეისბუქისა და ინსტაგრამის მშობელმა კომპანია მეტამ მალე შიშველი მკერდის ფოტოები შეიძლება აღარ დაბლოკოს. მეტას სამეთვალყურეო საბჭომ კომპანიას იმ წესების გადახედვა მოსთხოვა, რომლებიც სოციალურ ქსელში ქალის შიშველი მკერდის გამოჩენას კრძალავს, კაცისას კი — არა.

17 იანვრის გადაწყვეტილებით, სამეთვალყურეო საბჭომ, რომელიც მეცნიერებით, პოლიტიკოსებითა და ჟურნალისტებითაა დაკომპლექტებული, მეტას პოსტების შინაარსთან დაკავშირებული წესების შემსუბუქება ურჩია. კერძოდ, საბჭომ რეკომენდაცია გაუწია იმ წესის ცვლილებას, რომელიც ზრდასრულთა სიშიშვლესა და სექსუალური აქტივობის საზოგადოდო სტანდარტს ეხება. "წესი უნდა ემორჩილებოდეს მკაფიო კრიტერიუმებს, რომლებიც ადამიანის უფლებათა საერთაშორისო სტანდარტებს პატივს სცემს", — ვკითხულობთ საბჭოს გადაწყვეტილებაში.

ფოტო: Getty Images

სამეთვალყურეო საბჭომ ეს გადაწყვეტილება მას შემდეგ მიიღო, რაც ამერიკელი ტრანსგენდერი წყვილის ორი პოსტი ფეისბუქმა ცენზურის გამო დაბლოკა. წყვილმა ფოტო გამოაქვეყნა, რომელში წელს ზევით შიშვლები იყვნენ, თუმცა კერტები დაფარული ჰქონდათ. პოსტის აღწერა კი ტრანსგენდერების ჯანდაცვას ეხებოდა და ისინი ოპერაციისთვის ფულის შეგროვებას ითხოვდნენ.

ფეისბუქის ზოგიერთმა მომხმარებელმა პოსტი გაასაჩივრა, რის შედეგადაც მეტას ხელოვნურმა ინტელექტმა ფოტოები დაბლოკა. მას შემდეგ, რაც წყვილმა ფეისბუქის მიერ პოსტების დაბლოკვა გაასაჩივრა, კომპანიამ ფოტოები აღადგინა.

"მეტას პოლიტიკა გენდერის ბინარულობას ეფუძნება, რომელიც ქალისა და კაცის სხეულებს შორის განსხვავებას აღიარებს. ეს კი შიშველი მკერდის გამოჩენის წესებს გაურკვეველს ხდის ტრანსგენდერი და არაბინარული გენდერული იდენტობის მქონე მომხმარებლებისთვის", — ვკითხულობთ სამეთვალყურეო საბჭოს განცხადებაში. საბჭოს გადაწყვეტილებით, როცა საქმე სიშიშვლეს ეხება, უნდა განისაზღვროს მკაფიო და ობიექტური კრიტერიუმები ისე, რომ ისინი თითოეულ მომხმარებელზე ადამიანის უფლებათა საერთაშორისო სტანდარტების შესაბამისად ვრცელდებოდეს.

"მეტა მიესალმება საბჭოს გადაწყვეტილებას ამ კონკრეტულ საქმეზე და საბოლოო გადაწყვეტილების მიღებამდე, ფოტოები აღდგენილია. ჩვენს პოლიტიკას მუდმივად ვავითარებთ, რათა ჩვენი პლატფორმა ყველასთვის უსაფრთხო გახდეს. ვიცით, რომ LGBTQ+ საზოგადოების მხარდასაჭერად მეტი შეიძლება გაკეთდეს, რაც ჩვენთვის ექსპერტებთან და LGBTQ+ დამცველ ორგანიზაციებთან ერთად მუშაობასა და სხვადასხვა საკითხზე მსჯელობას ნიშნავს", —ვკითხულობთ მეტას განცხადებაში.

მეტას 60 დღე აქვს, რათა სამეთვალყურეო საბჭოს თითოეულ რეკომენდაციას საჯაროდ უპასუხოს.