ეროვნული ბანკის ინფორმაციით, ნოემბერში საზღვარგარეთის ქვეყნებიდან საქართველოში $521 მილიონი გადმოირიცხა, რაც გასული წლის ანალოგიურ პერიოდთან შედარებით, 151%-ით მეტია. განსაკუთრებული ზრდა კი რუსეთიდან დაფიქსირდა.

რატომ არის მნიშვნელოვანი: ფულადი გზავნილები ქვეყანაში მოხმარებაზე აისახება, რაც მშპ-ს ერთ-ერთი კომპონენტია.

  • ფულადი გზავნილები ლარის კურსზეც ახდენს გავლენას;
  • კონკრეტულ შემთხვევაში იზრდება რუსეთზე ეკონომიკური დამოკიდებულება, რაც საფრხისშემცველია.

იანვარ-ნოემბერში საქართველოში რეკორდული ოდენობის — $3,837 მილიარდი გადმოირიცხა.

  • ეს თანხა 2021 წლის ანალოგიურ მაჩვენებელს 81%-ით, თანხობრივ გამოხატულებაში კი $1,717 მილიარდით აჭარბებს;
  • უშუალოდ რუსეთიდან 11 თვეში ფულადი გზავნილების მოცულობა 371%-ით $372 მილიონიდან $1,751 მილიარდამდე გაიზარდა.

ბოლო 10 წლის განმავლობაში ფულად გზავნილებში რუსეთზე დამოკიდებულება 54%-დან 18%-მდე იყო შემცირებული.

  • კლება მიმდინარე წლის პირველ კვარტალში მათ შორის მარტშიც გაგრძელდა;
  • დრამატული ზრდა კი აპრილიდან დაიწყო;
  • 11 თვეში რუსეთის წილმა ფულად გზავნილებში 46%-ს მიაღწია, მხოლოდ ნოემბერში 61%-ს.

რუსეთიდან ფულადი გზავნილებისა და ვიზიტორების რაოდენობის ზრდას დროში უძრავი ქონების, როგორც გასაყიდი, ასევე, გასაქირავებელი ფასების მკვეთრი ზრდა დაემთხვა.

  • თიბისი კაპიტალის კვლევის მიხედვით, 2022 წლის ოქტომბერში, გასული წლის ანალოგიურ პერიოდთან შედარებით თბილისში ბინის გასაყიდი ფასი 28%-ით, ხოლო გასაქირავებელი ფასი 120%-ით გაიზარდა.