29 ნოემბერს, ბუქარესტში, ნატოს წევრი ქვეყნების საგარეო საქმეთა მინისტრები შეიკრიბნენ.

რატომ არის მნიშვნელოვანი: ორგანიზაციის განცხადებით, რუსეთის მიერ უკრაინაში მიმდინარე შეჭრა საფრთხეს უქმნის ევროატლანტიკურ მშვიდობას, უსაფრთხოებას და კეთილდღეობას.

  • განცხადების მიხედვით, ყველამ, ვინც პასუხისმგებელია ომის დანაშაულებზე და ხელს უწყობს რუსეთის აგრესიულ ომს, პასუხი უნდა აგოს.
  • ერთობლივ დოკუმენტში ხელმომწერები ადასტურებენ, რომ გააგრძელებენ უკრაინის პოლიტიკურ და პრაქტიკულ მხარდაჭერას მანამ, სანამ ეს საჭირო იქნება.
  • ალიანსის განცხადებით, ბოლო ათწლეულების განმავლობაში უდიდესი გამოწვევების ფონზე, ნატო ახორციელებს ახალ საბაზისო ხაზს შეკავებისა და თავდაცვითი პოზიციების გაძლიერებისა და განვითარებისთვის.

დეტალები: განცხადებაში მიმოხილულია ის ძირითადი დანაშაულები, რასაც რუსეთი უკრაინაში სრულმასშტაბიანი შეჭრის შემდეგ სისტემატურად სჩადის.

  • სისტემატური თავდასხმები უკრაინის მშვიდობიან მოსახლეობაზე, უკრაინის სამოქალაქო და ენერგეტიკულ ინფრასტრუქტურაზე.
  • ადამიების იძულებითი დეპორტაცია და წამება. სექსუალური ძალადობა, ბარბაროსული მოპყრობა ქალების, ბავშვებისა და დაუცველ სიტუაციებში მყოფი პირების მიმართ.
  • გლობალური საკვების კრიზისის გამოწვევა და მსოფლიოს ყველაზე დაუცველი ქვეყნებისა თუ ხალხის საფრთხის ქვეშ დაყენება.
  • რუსეთის ჰიბრიდული აქტივობები, ენერგეტიკული შანტაჟი და დაუფიქრებელი ბირთვული რიტორიკა, რომელიც ძირს უთხრი საერთაშორისო წესრიგს.

ამასთანავე, ნატო ადასტურებს 2008 წელს ბუქარესტის სამიტზე მიღებული გადაწყვეტილების ურყეობას საქართველოს და უკრაინის მიმართ. განცხადების მიხედვით, დასავლეთ ბალკანეთს და შავი ზღვის რეგიონებს ალიანსისთვის სტრატეგიული მნიშვნელობა აქვთ.

  • მინისტერიალის შეხვედრაში ფინეთი და შვედეთი მონაწილეობენ როგორც ალიანსში გასაწევრიანებლად მოწვეული სახელმწიფოები.