საქართველოს განათლებისა და მეცნიერების მინისტრი, ვიცე-პრემიერი, ალექსანდრე ჯეჯელავა ამბობს, რომ მას არასწორი ინფორმაცია ჰქონდა 31 მაისს, როცა თქვა, რომ აფგან მუხტარლი არა ჟურნალისტი, არამედ რადიო თავისუფლების დაცვის სამსახურის თანამშრომელი იყო:

"დაზუსტდა და იყო ჟურნალისტი ნამდვილად, გუშინ არასწორი ინფორმაცია მქონდა. ის იყო უსაფრთხოების სამსახურის უფროსი და ამავდროულად არის ჟურნალისტური გამოძიებების ავტორი. შესაბამისად, მას ორივე როლი ჰქონდა".

მინისტრის თქმით სიცრუეა, რომ ქართულმა მხარემ ჟურნალისტი აზერბაიჯანულ მხარეს გადასცა ან ითანამშრომლა მასთან.

აფგან მუხტარლი წლებია ჟურნალისტად მუშაობს. მისი არაერთი ჟურნალისტური ნამუშევრის ნახვაა შესაძლებელი როგორც IWPR-ის, ისე, Meydan TV-ს ვებსაიტებზე. მისი კრიტიკული სტატიების მთავარი ობიექტი ალიევის რეჟიმი და აზერბაიჯანში არსებული კორუფციული სისტემაა.

აფგან მუხტარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას თქმით, მას აინტერესებს, როგორ გადაკვეთა მუხტარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხტარლიმ აზერბაიჯანში ადვოკატს უთხრა, რომ ის ნაცემია.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხტარლში ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ.

საქართველოში მომუშავე ჟურნალისტებისა და სამოქალაქო საზოგადოების წარმომადგენელთა ნაწილი უკვე მეორე დღეა მართავს საპროტესტო აქციებს. ისინი საქართველოს ხელისუფლებისგან ითხოვენ პასუხს, თუ როგორ აღმოჩნდა თბილისის ცენტრიდან გაუჩინარებული ჟურნალისტი ბაქოს ციხეში.