უკრაინული მედიის ცნობით, სარაკეტო დარტყმები 23 ნოემბერს, გამთენიისას დაიწყო.

რატომ არის მნიშვნელოვანი: დედაქალაქის მერის, ვიტალი კლიჩკოს განმარტებით, რუსულ თავდასხმას ოთხი მსხვერპლი ჰყავს.

  • მისივე თქმით, ერთ დაშავებულს მედიკოსები ადგილზე დაეხმარნენ.
  • აფეთქების შედეგად დაზიანდა მნიშვნელოვანი ინფრასტრუქტურა.
  • სარაკეტო თავდასხმის გამო კიევის მთელ ტერიტორიაზე შეფერხდა ენერგიისა და წყლის მიწოდება.

დეტალები: კიევის რეგიონული სახელმწიფო ადმინისტრაციის ხელმძღვანელი ალექსი კულება მოსახლეობას მოუწოდებს, რომ არ უგულებელყონ საჰაერო თავდასხმის სიგნალი და დარჩნენ თავშესაფარში.

  • მერის თქმით, პუტინს სურს, სამოქალაქო ინფრასტრუქტურაზე თავდასხმით, ხალხი აიძულოს, რომ დედაქალაქიდან გაიქცნენ, მაგრამ ის საპირისპიროს მიაღწევს.
  • თუმცა კლიჩკო არ გამორიცხავს, რომ დედაქალაქის ზოგიერთ მაცხოვრებელს ევაკუაცია მოუწიოს, თუ ელექტროენერგიის მიწოდება კიდევ უფრო გაუარესდება და ტემპერატურა დაეცემა.
  • მანვე განაცხადა, რომ "მეორე მსოფლიო ომის შემდეგ ყველაზე ცუდი ზამთარი" ელით, რადგან უკრაინის დედაქალაქს ასეთი "საშინელი ზამთარი" მას შემდეგ არ განუცდია.

კიევის მერი ამბობს იმასაც, რომ რუსეთს ხალხის დაშინება, გაყინვა და ელექტრო ენერგიის გარეშე დარჩენა სურს, რათა მათ ზელენსკის დანებებისკენ უბიძგოსნ

  • "მაგრამ ეს არ მოხდება. ჩემი აზრით, ხალხი მხოლოდ უფრო გაბრაზდება. ჩვენ არ მოვკვდებით და არ გავიქცევით, როგორც პუტინს სურს. ჩვენ ყველაფერს ვაკეთებთ, რაც შეგვიძლია, ვმუშაობთ 24/7. არ გავიქცევით დასავლეთში, როგორც პუტინს სურს. ის ბევრჯერ შეცდა ამ ომში და ისევ ცდება", — თქვა კლიჩკომ.

პირველი შემთხვევა არაა, როცა რუსეთი კიევზე სარაკეტო თავდასხმისას მიზანმიმართულად აზიანებს ელექტროენერგიასა და კრიტიკულ ინფრასტრუქტურას.

  • 15 ნოემბერს, მასიური სარაკეტო შეტევის გამო, მთელ უკრაინაში ელექტროენერგიის გადაუდებელი გათიშვა გახდა საჭირო.