საქართველოს ჟურნალისტური ეთიკის ქარტიის დირექტორი, ნატა ძველიშვილი On.ge-სთან საუბარში აცხადებს, რომ ხელისუფლებამ ყველა კითხვას უნდა გასცეს ამომწურავი პასუხი იმის შესახებ, თუ როგორ აღმოჩნდა თბილისში გაუჩინარებული აზერბაიჯანელი ჟურნალისტი, აფგან მუხთარლი, ბაქოში. ნატა ძველიშვილმა ამის შესახებ თბილისში, მთავრობის კანცელარიასთან დღეს გამართულ აქციაზე ისაუბრა:

"ჩვენ სოლიდარობას ვუცხადებთ ჩვენს დაკავებულ აზერბაიჯანელ კოლეგას და ვითხოვთ იმ კითხვებზე პასუხის გაცემას, რაც ამ საქმეზე დაგროვდა. მაგალითად, ის, თუ რა როლი ითამაშა იმაში ქართულმა მხარემ, რომ თბილისში გაუჩინარებული ჟურნალისტი მეორე დღეს აღმოჩნდა ბაქოში, იქ, სადაც მის სიცოცხლეს საფრთხე ემუქრება და საიდანაც ის დიდი ხნის წინ წამოვიდა იმ იმედით, რომ თბილისში იპოვიდა უსაფრთხო ცხოვრების საშუალებას. სამწუხაროდ, აღმოჩნდა, რომ საქართველოში არ არის დაცული ადამიანის უფლებები, წარმოუდგენელი ამბავი ხდება. ჩვენ ვითხოვთ ისეთი გამოძიების ჩატარებას, რომელიც არ დატოვებს კითხვებს და ბევრ კითხვას გასცემს პასუხს."

აფგან მუხთარლის მხარდასაჭერად გამართულ აქციას, ჟურნალისტებთან ერთად შეუერთდნენ არასამთავრობო და პოლიტიკური ორგანიზაციების წარმომადგენლებიც. ჟურნალისტთა ნაწილს სიმბოლურად თავზე წამოცმული ჰქონდა პარკი, რადგან როგორც აფგან მუხთარლის ადვოკატი ამბობს, ჟურნალისტს თბილისში თავზე წამოაცვეს ტომარა და ისე გაიტაცეს.

აფგან მუხთარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას თქმით, მას აინტერესებს, როგორ გადაკვეთა მუხთარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხთარლიმ აზერბაიჯანში ადვოკატს უთხრა, რომ ის ნაცემია.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხთარლში ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ.