ძლიერმა 8.8 მაგნიტუდის მიწისძვრამ, რომელიც რუსეთის კამჩატკის ნახევარკუნძულთან მოხდა, 4-მეტრიანი ცუნამის ტალღები გამოიწვია. ევაკუაციის ბრძანებები გაიცა ჰავაიზე, იაპონიაში და წყნარი ოკეანის სხვა რეგიონებში. ამის შესახებ ინფორმაციას Reuters ავრცელებს.

მიწისძვრამ სერიოზული ზიანი მიაყენა შენობებს, ასევე რუსეთის აღმოსავლეთში რამდენიმე ადამიანი დაშავდა. სევერო-კურილსკში ტალღებმა პორტი და თევზის გადამამუშავებელი ქარხანა დაიტბორა და გემები მიმაგრებული ადგილებიდან მოწყვიტა. კამჩატკის გუბერნატორის თქმით, ეს რეგიონში ათწლეულების მანძილზე ყველაზე ძლიერი ბიძგები — და 1952 წლის შემდეგ ყველაზე ძლიერი მიწისძვრა იყო .

რუსეთის საგანგებო სიტუაციების სამინისტრომ აღნიშნა, რომ დაზიანდა საბავშვო ბაღი, თუმცა უმეტესად შენობები მდგრადი აღმოჩნდა და სერიოზული დაზიანებები ან მსხვერპლი არ დაფიქსირებულა.

ჰავაიზე მაცხოვრებლებს მოუწოდეს, შემაღლებულ ადგილებზე ან შენობების მეოთხე სართულზე ან ზემოთ გადასვლისკენ. სანაპირო დაცვამ გემები სადგომებიდან გაიყვანა.

იაპონიაში, წყნარი ოკეანის სანაპიროზე ცუნამის სირენები ჩაირთო და ათობით ათასი ადამიანი ევაკუირებული იქნა. მათ შორის — ფუკუშიმას ატომურ ელექტროსადგურიდანაც, სადაც 2011 წლის ცუნამის დროს ავარია მოხდა. კუნძულ ჰოკაიდოზე გამაფრთხილებელი სირენების ხმა ისმის, რადგან ცუნამის პირველმა ტალღებმა კუნძულს უკვე მიაღწია, თუმცა ტალღების სიმაღლე მცირეა.