დღეს, 11 ნოემბერს გავრცელდა ინფორმაცია, რომ ანტონოვკას ხიდი, რომელიც ხერსონის ოლქის მარჯვენა და მარცხენა სანაპიროებს ერთმანეთთან აკავშირებს, ჩაინგრა.

რატომ არის მნიშვნელოვანი: ანტონოვკის ხიდი ერთადერთი გადასასვლელია მდინარე დნეპრზე და ქალაქ ხერსონს მარცხენა სანაპიროსთან აკავშირებს.

  • სწორედ მარცხენა სანაპიროზე გადავიდნენ რუსული ჯარები, მას შემდეგ, რაც თავდაცვის მინისტრმა ოლქის დატოვების ბრძანება გასცა.
  • შესაბამისად, ხერსონიდან გასულმა რუსებმა "უკან დასაბრუნებელი გზა" არ დაიტოვეს და ხიდიც, სავარაუდოდ, იმ მიზნით ააფეთქეს, რომ უკრაინელების წინსვლა შეეჩერებინათ, რომლებიც ოლქზე კონტროლს იბრუნებენ.
  • რუსეთი ამ ხიდს ხერსონში დისლოცირებული სამხედროებისთვის მარაგის მიწოდებისთვის იყენებდა.

დეტალები: დღეს ცნობილი გახდა, რომ რუსმა სამხედროებმა ააფეთქეს ანტონოვსკას ხიდი მდინარე დნეპრზე და იქვე მდებარე სარკინიგზო ხიდიც.

  • "ზარალის ბუნებიდან გამომდინარე, რუსებმა ააფეთქეს. არტილერია ამას ვერ შეძლებდა", — ამბობს ხერსონელი ჟურნალისტი.
  • რუსმა პროპაგანდისტმა დანგრეული ანტონოვსკის ხიდის ვიდეო გაავრცელა და თქვა, რომ რუსებმა ხიდი ააფეთქეს მას შემდეგ, რაც სამხედროებმა ხერსონის მარჯვენა სანაპირო დატოვეს.
  • თუმცა, როგორც Unian წერს, ამჟამად არ არსებობს არანაირი მტკიცებულება, რომ რუსებმა მოახერხეს მარცხენა სანაპიროზე გადასვლა.
  • ამის არგუმენტად ტელეგრამში გავრცელ ვიდეოებსაც იყენებენ, სადაც ჩანს, რომ "მსოფლიოს მეორე არმია" ხერსონს ფეხით ტოვებს.

გარდა ამისა, რუსეთის თავდაცვის სამინისტრომ განაცხადა, რომ დღეს დილით მათ დაასრულეს "რუსული ჯარების ნაწილების გადაყვანა დნეპრის მარცხენა სანაპიროზე".

  • რუსეთის პროპაგანდისტული მედია, რია ნოვოსტი ამტკიცებს, რომ ხერსონის დატოვებისას, არცერთი სამხედრო ტექნიკა და იარაღი არ დარჩენილა მარჯვენა სანაპიროზე, ტერიტორია კი დატოვა ყველა რუსმა სამხედრომ.

კონტექსტი: 9 ნოემბერს ცნობილი გახდა, რომ რუსები ხერსონს ტოვებენ. მას შემდეგ, აქტიურად ვრცელდება ინფორმაცია უკრაინის მიერ გათავისუფლებული დასახლებების შესახებ.

  • რუსეთმა ხერსონის ანექსია გამოაცხადა და რეგიონს საკუთარ ტერიტორიად მიიჩნევს — ამიტომ რუსეთის თავდაცვის განცხადება "საკუთარი" ქალაქის დათმობას ნიშნავს.
  • ხერსონი პირველი ქალაქია, რომელიც ოკუპანტებმა დაიკავეს უკრაინაში სრულმასშტაბიანი შეჭრის შემდეგ.