რუსეთ-უკრაინის ომის გავლენით, 2022 წელს გლობალური ეკონომიკა მოსალოდნელზე ნაკლებად გაიზრდება. სახელმწიფოები, კომპანიები და მათში დასაქმებულები დაგეგმილზე ნაკლებ შემოსავლებს მიიღებენ, თუმცა არსებობს გამონაკლისებიც. ასეთი გამონაკლისები კი ნავთობკომპანიებია.

Brent-ის მარკის ბარელი ნავთობის ფასი წლის დასაწყისში $80-ს შეადგენდა, 10 ნოემბრის მდგომარეობით ფასი $92-ა, თუმცა მარტიდან ივლისის ჩათვლით მისი ღირებულება $100-ს აჭარბებდა და რამდენჯერმე $120-საც გადასცდა. დინამიკა მსგავსია WTI-ს შემთხვევაშიც. ნედლი ნავთობის გაძვირებამ BP-ს Shell-ისა და Exxon mobil-ის აქციების ფასთა ზრდა გამოიწვია.

BP-ს კაპიტალიზაცია 1-ლი იანვრის მდგომარეობით $88 მილიარდს შეადგენდა, 10 თვის თავზე ბრიტანული ნავთობკომპანიის აქციების ჯამური ღირებულება $100 მილიარდამდე გაიზარდა. მარტსა და ივლისში $110 მილიარდს აღწევდა, მაგრამ პანდემიამდელ ნიშნულს ვერც მაშინ გაუთანაბრდა. 2020 წლის თებერვალში BP-ის ღირებულება $122 მილიარდს შეადგენდა.

ბოლო 10 თვეში BP-ის ერთი აქციის ღირებულება $27,4-დან $32.9-მდე გაიზარდა.

$175 მილიარდიდან $190 მილიარდამდე გაიზარდა კიდევ უფრო მსხვილი Shell-ის კაპიტალიზაციაც. BP-ს მსგავსად, მიუხედავად იმისა, რომ ნედლი ნავთობის ფასმა მარტში 14 წლიანი რეკორდი მოხსნა, პანდემიამდელ მაჩვენებელს ვერც Shell-ის ღირებულება გაუთანაბრდა. 2019 წლის დეკემბერში Shell $240 მილიარდი ღირდა.

ბოლო 10 თვეში Shell-ის ერთი აქციის ღირებულება $42,2-დან $53,9-მდე გაიზარდა.

ზრდის ტემპი ბევრად უფრო შთამბეჭდავი შეერთებულ შტატებში აღმოჩნდა სადაც 10 თვეში Exxon mobil-ის კაპიტალიზაცია $260 მილიარდიდან $455 მილიარდამდე გაიზარდა. ამ შემთხვევაში მისმა ღირებულებამ პანდემიამდელ პერიოდს მნიშვნელოვნად გადააჭარბა. 2019 წლის ბოლოს Exxon mobil-ის ღირებულება $295 მილიარდს შეადგენდა.

ბოლო 10 თვეში Exxon mobil-ის ერთი აქციის ღირებულება $68,9-დან $110,5-მდე გაიზარდა.

ბრიტანულ-ამერიკული კომპანიების გარდა გაზრდილია როგორც ჩინური, ისე არაბული ნავთობკომპანიების აქციათა ღირებულებაც. Saudi Aramco-ს კაპიტალიზაცია $2 ტრილიონს აღწევს და 2022 წლის ნოემბრის მდგომარეობით Apple-ის შემდეგ მეორე ადგილს იკავებს.

ნედლი ნავთობისა და ნავთობკომპანიის ღირებულება ყოველთვის პირდაპირპროპორციული არ არის, თუმცა, როგორც წესი, კომპანიის აქციათა ფასები წიაღისეულის ფასს მიჰყვება. დანარჩენი ფაქტორები შეიძლება იყოს ბუნებრივი გაზის ფასი, (ნავთობკომპანიები, როგორც წესი, გაზსაც მოიპოვებენ), მოთხოვნის მოცულობა, შიდა სტრუქტურული მდგომარეობა და ა.შ.

შიშები იმის შესახებ, რომ ბარელი ნავთობის ფასი $200 ან მითუმეტეს $300-ს გადასცდებოდა არ გამართლდა და ამ ეტაპზე მსგავსი პროგნოზის გაკეთების რაიმე წინაპირობა არ არსებობს, თუმცა არც ფასების მკვეთრი კლებაა მოსალოდნელი. ირანთან მოლაპარაკება ვერ მოხერხდა, OPEC+ ქვეყნებმა კი ნავთობის მოპოვების დღიურად 2 მილიონი ბარელით შემცირების გადაწყვეტილება მიიღეს.

აქციებით ვაჭრობა ახლა უკვე საქართველოს ბანკის მობილბანკით არის შესაძლებელი. ესტუმრე მობილბანკს, რომლის საშუალებითაც ისეთი საერთაშორისო კომპანიების ფასიანი ქაღალდებით ვაჭრობას შეძლებ, როგორებიცაა: Apple, Amazon, Microsoft, Tesla, Google და სხვა. ეს სიახლე საქართველოს ბანკმა მისი ჯგუფის შვილობილი კომპანიის, Galt & Taggart-ისა და საერთაშორისო ფინანსური ტექნოლოგიების პლატფორმა DriveWealth-ის პარტნიორობით დანერგა. თუ გსურს მეტი გაიგო ინვესტიციების შესახებ, ესტუმრე ფეისბუქგვერდს — ინვესტიციები, სადაც გაიგებ მეტს, თუ როგორ ივაჭრო აქციებით.

ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე, როგორც მოგება. თქვენ დეტალურად უნდა გააანალიზოთ, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა გასწიოთ თანხის დაკარგვის რისკი.