ცნობილი კინოვარსკვლავი და ამერიკის კინოაკადემიის ჯილდოს მფლობელი მსახიობი შონ პენი უკრაინის დედაქალაქ კიევს წელს კიდევ ერთხელ ეწვია. ომის დაწყების შემდეგ ქვეყანაში თავისი მესამე ვიზიტისას, პენი ქვეყნის პრეზიდენტს, ვოლოდიმირ ზელენსკის, ისევ შეხვდა და მას პატარა საჩუქარიც მოუმზადა.

გავრცელებულ ვიდეოში ჩანს, რომ ამერიკელმა მსახიობმა უკრაინაში თავისი ოსკარი ჩაიტანა და ის ზელენსკის გადასცა.

"თავს საშინლად ვგრძნობ, ეს კი, უბრალოდ, სიმბოლური, სულელური რაღაცაა", — უთხრა პენმა უკრაინის პრეზიდენტს, — "მაგრამ, თუკი მეცოდინება, რომ ის აქაა, თქვენთან, თავს უკეთ და ბრძოლისთვის უფრო მხნედ ვიგრძნობ. [ომს] რომ მოიგებთ, მერე დამიბრუნეთ მალიბუში".

აღსანიშნავია, რომ ვიზიტისას პრეზიდენტმა ზელენსკიმ შონ პენი უკრაინის ღირსების ორდენითაც დააჯილდოვა, "სიმამაცის ხეივანზე" კი მისი სახელობის დაფაც გაიხსნა.

"ეს შეხვედრა განსაკუთრებული იყო", — წერს ზელენსკი ფეისბუქზე, — "შონმა თავისი ოსკარი ჩამოგვიტანა, როგორც ჩვენი ქვეყნის გამარჯვების რწმენის სიმბოლო. უკრაინაში ის ომის დასრულებამდე დარჩება".

აღსანიშნავია, რომ პენი უკრაინაში რუსეთის შეჭრიდან მალევე ჩავიდა და ქვეყანას მხარდაჭერა გამოუცხადა. მსახიობმა და რეჟისორმა გადაწყვიტა, რუსეთის სამხედრო აგრესიაზე დოკუმენტური ფილმიც გადაეღო. მოგვიანებით, მან ამერიკის კინოაკადემიას ულტიმატუმი წაუყენა და კატეგორიულად მოსთხოვა, ოსკარის დაჯილდოების ღონისძიებაზე უკრაინის პრეზიდენტი ვირტუალურად ჩაერთოთ.

მისი პოლიტიკური აქტივიზმისა და უკრაინის მხარდაჭერის გამო, რუსეთის საგარეო საქმეთა სამინისტრომ რამდენიმე კვირის წინ შონ პენს ქვეყანაში შესვლა აუკრძალა.