თუ ერთხელ მაინც მჯდარხარ საჭესთან, დარწმუნებული ვართ, ზუსტად ხვდები, რას ნიშნავს ფრაზა — მეგზურსაც გააჩნია. მძღოლებიც დაგვეთანხმებიან, რომ შეიძლება მოკლე გზა ძალიან გრძლად მოგეჩვენოს ან პირიქით, გრძელ გზაზე საერთოდაც არ დაიღალო, თუ გვერდს შენი ხასიათის შესაფერისი მეგზური გიმშვენებს.

თუ გაინტერესებს, რომელი ტიპის მეგზურებია მძღოლებისთვის ყველაზე სასურველი კომპანიონები, ამას სწორედ სტატიიდან გაიგებ.

1. ორიენტაციის კარგი უნარის მქონე

ფოტო: Tenor

თანამედროვე ტექნოლოგიების ეპოქაში ზედმეტად მონდომებული მძღოლი უნდა იყო, რომ დაიკარგო ან დანიშნულების ადგილს ვერ მიაგნო. თუმცა გამორიცხული არაფერია და თუ უცხო ადგილას GPS-ისა და რუკის გარეშე აღმოჩნდები, ამ დროს საუკეთესო მეგზურობას ის ადამიანი გაგიწევს, რომელსაც ორიენტაციის კარგი უნარი აქვს.

ორიენტაციის კარგი უნარის მქონე ადამიანთან ერთად მოგზაურობა პროცესს აუცილებლად გაგიმარტივებს. ამასთანავე, ფრაზა: "მგონი, უნდა გადაგვეხვია" ამ ტიპის მეგზურთან ერთად არასდროს შეგაწუხებს, რადგან მან ზუსტად იცის, რომელი გზა მიდის დანიშნულების ადგილამდე. იმაშიც დარწმუნებული შეგიძლია იყო, რომ ასეთ მეგზურთან ერთად დანიშნულების ადგილს სწრაფად და დაბრკოლებების გარეშე მიაღწევ.

2. მელომანი

ფოტო: Tenor

თუ შენთვის მგზავრობა მხოლოდ ერთი ადგილიდან მეორემდე გადაადგილებას არ ნიშნავს და დროის სასიამოვნოდ გატარება გსურს, ალბათ მუსიკის შერჩევაზეც ისე ზრუნავ, როგორც საკუთარ ავტომობილზე. ასეთ შემთხვევაში კი, მელომანი მართლაც საოცნებო მეგზურია, რომელიც ყველა საყვარელ მელოდიას ბოლომდე მოგასმენინებს, გამორთვას არ მოგთხოვს და მეტიც, სიმღერაში აგყვება კიდეც. თუ მგზავრობისას განტვირთვა შენი პრიორიტეტია, მელომანთან ნამდვილად ვერ მოიწყენ და ბევრ მხიარულ მოგონებასაც შექმნი.

3. მძინარა

ფოტო: Tenor

როცა საჭესთან ხარ, მთავარია, არ ჩაგეძინოს, თუმცა ეს წესი მეგზურზე არ ვრცელდება. თუ ფრაზა: "მალე ჩავალთ?" ძალიან გაღიზიანებს, ამის მოსმენა მძინარა მეგზურთან ერთად ნამდვილად არ გემუქრება.

ზოგ ჩვენგანს ფიქრი სწორედ იმ დროს სიამოვნებს, როცა მიხვეულ-მოხვეულ გზებზე ათასნაირი პეიზაჟი ჩნდება და ეს ერთგვარი განტვირთვაცაა. ასე რომ, თუ მძინარა თანამგზავრი გყავს, სიჩუმეში მგზავრობით ტკბობას ყოველთვის შეძლებ.

4. მოლაპარაკე

ფოტო: Tenor

თუ წინ გრძელი გზა გაქვს და როგორც მძღოლს, სიფხიზლე მოგეთხოვება, ამ დროს მოლაპარაკე თანამგზავრი საუკეთესო კომპანიონია. მგზავრობისას უხერხული სიჩუმე და მოწყენილობა ბევრ ჩვენგანს ტანჯავს. მოლაპარაკე მეგზურთან ერთად კი შეგიძლია, მსგავს უხერხულობას დაემშვიდობო და საინტერესო დიალოგებისთვის მოემზადო.

თუ დიდხნიანი დიალოგი ძალიან გამწვავდება, არც ის დაივიწყო, რომ ჭეშმარიტება სწორედ კამათში იბადება!

5. მსმენელი

ფოტო: Tenor

კარგ მთქმელს რომ კარგი გამგონე უნდა, ეს მძღოლებსა და მათ მეგზურებზეც ვრცელდება. აზრებისა და ემოციების გაცვლა-გამოცვლა კი წარმატებული მაშინ იქნება, როცა ჩვენი მეგზური კარგი მსმენელია. როცა მეგზურს თან აინტერესებს შენი აზრები და თან ყველაფერს სწორადაც იგებს, მასთან ერთად შორეულ მოგზაურობაში წასვლაც კი არ იქნება მოსაწყენი.


ხშირად ბრენდები თავს შენი ცხოვრების მესაჭედ და ლიდერად წარმოაჩენენ, ცდილობენ, გიკარნახონ ცხოვრების სტილი. სოკარმა კი გადაწყვიტა, ეს მიდგომა შეცვალოს და იმ "მეგზურებზე" გააკეთოს აქცენტი, რომლებიც ცხოვრებასა თუ, უბრალოდ, მოგზაურობაში შესანიშნავ კომპანიონობას გვიწევენ.

აშკარაა, რომ ყოველდღიურად სხვადასხვა პროფესიის ადამიანები ჩვენს ცხოვრებაში მეგზურის როლს ასრულებენ. შეიძლება, ამ კავშირს პირდაპირ ვერ ვამჩნევდეთ, თუმცა მათ გარეშე ჩვენი ცხოვრებისეული მოგზაურობა მართლაც რთული იქნებოდა.