ნაციონალური მოძრაობა გამოდის ინიციატივით, ოკუპაციის შესახებ საქართველოს კანონში ცვლილებები შევიდეს.

რატომ არის მნიშვნელოვანი: 21 სექტემბერს პუტინმა რუსეთში ნაწილობრივი მობილიზაცია გამოაცხადა — მას შემდეგ რუსეთის მოქალაქეები ქვეყნის დატოვებას ცდილობენ, საზღვრებთან და აეროპორტებში რამდენიმესაათიანი რიგებია.

  • ნაწილი საქართველოში გამოქცევას ცდილობს — ლარსის გამშვები პუნქტთან რამდენიმე დღეა დაახლოებით 13-15-კილომეტრიანი საცობებია;
  • ვახტანგ გომელაური ამბობს, რომ მობილიზაციის გამოცხადების შემდეგ გადმომსვლელთა მაჩვენებელმა, წინა დღეებთან შედარებით 40-45%-ით მოიმატა.

რას ითვალისწინებს ინიციატივა: პარტიის წევრის, ლევან ბეჟაშვილის განმარტებით, საქართველოში შემოსული რუსეთის მოქალაქეებისთვის უნდა დაწესდეს საოკუპაციო შენატანი 1 000 ლარის ოდენობით.

  • ბეჟაშვილის თქმით, ერთი მხრივ, ეს იქნება საქართველოში შემოსული რუსეთის მოქალაქეების აღიარება, რომ რუსეთი ოკუპანტია და მეორე მხრივ, გადახდილი თანხა ჩაირიცხება დევნილთა დახმარების ფონდში.

რიცხვებში: შსს-მ გუშინ, 27 სექტემბერს გამოაქვეყნა მონაცემები. მობილიზაციის ამოქმედებამდე, საქართველოს საზღვარი ყველა გამშვები პუნქტიდან გადმოკვეთა და გადაკვეთა:

  • 17 სექტემბერს: 6 986 — 7 406;
  • 18 სექტემბერს: 6 606 — 6 743;
  • 19 სექტემბერს: 6 411 — 6 782;
  • 20 სექტემბერს: 5 603 — 6 199 პირმა.

მობილიზაციის გამოცხადების შემდეგ, მონაცემები გაზრდილია. მაგალითად, 21 სექტემბერს რუსეთიდან საზღვარი გადმოკვეთა 6 402-მა და გადაკვეთა 6 011-მა პირმა. დანარჩენ დღეებში შემოსულთა და გასულთა სტატისტიკა ასეთია:

  • 22 სექტემბერს: 6 150 — 6 050;
  • 23 სექტემბერს: 9 307 — 6 214;
  • 24სექტემბერს: 9 330 — 6 249;
  • 25 სექტემბერს: 11 143 — 5 519;
  • 26 სექტემბერს: 10 804 — 4 947.