ინფორმაციას ამის შესახებ რუსული სახელმწიფო მედიები სხვადასხვა წყაროზე დაყრდნობით ავრცელებენ.

რატომ არის მნიშვნელოვანი: მობილიზაციის გამოცხადების შემდეგ რუსეთის მოქალაქეების ნაწილი საქართველოში გამოქცევას ცდილობს.

  • ლარსის გამშვები პუნქტთან რამდენიმე დღე დაახლოებით 13-15-კილომეტრიანი საცობებია.
  • სოციალურ ქსელებში ვრცელდება ფოტო და ვიდეომასალა, სადაც ჩანს, რომ მობილიზებული რუსი კაცები მანქანებს ტოვებენ, ფეხით და ველოსიპედით მიდიან საზღვრამდე.
  • გუშინ ადგილზე სამხედროები და ჯავშანტექნიკა გამოჩნდა — იყო მოსაზრება, რომ საზღვრის ჩასაკეტად ან ბლოკ-პოსტის მოსაწყობად, მაგრამ FSB ამტკიცებდა, რომ სიტუაციის გასაკონტროლებლად და საზღვარზე უკანონო გარღვევის ასაცილებალად მივიდნენ.

დეტალები: დღეს ცნობილი გახდა, რომ სამხედრო აღრიცხვისა და გაწვევის სამობილიზაციო პუნქტი საზღვართან უახლოეს მომავალში გაიხსნება — გადაწყვეტილება ზემო ლარსის საგუშაგოზე გამართულ შეხვედრაზე მიიღეს.

  • ამ ეტაპზე უცნობია, როგორ იმუშავებს სამობილიზაციო პუნქტი და რომელი რეგიონის მოსახლეობას დაურიგებენ გაწვევის ბარათებს.
  • რუსულ მხარეს არც ის განუმარტავს, ნიშნავს თუ არა ეს, რომ მობილიზებულ პირებს საზღვარზე არ გაუშვებენ.
  • ამავე შეხვედრაზე გადაწყდა, რომ საცობების ასარიდებლად, საზღვრის კვეთის უფლება ქვეითებისთვისაც მიეცათ — აქამდე ეს მხოლოდ სატრანსპორტო საშუალებით იყო შესაძლებელი.
  • დღეს კიდევ გავრცელდა ვიდეო, რომელიც საზღვრისკენ რუსული ტექნიკის გადაადგილებას ასახავს, სავარაუდოდ, ამ შტაბის გასახსნელად.

რიცხვებში: რუსულ მედიებში გავრცელებული ინფორმაციით, დაახლოებით 250 000-მა, თუმცა შინაგან საქმეთა მინისტრი, ვახტანგ გომელაური ამას ტყუილს უწოდებს.

  • ჩრდილოეთ ოსეთის ვიცე-პრემიერის განცხადებით, ბოლო ერთი კვირის განმავლობაში ზემო ლარსის გამშვებ პუნქტზე ორივე მიმართულებით საზღვარი 37 500 ათასმა მანქანამ და 115 200 ადამიანმა გადაკვეთა.
  • გომელაური ამბობს, რომ 4-5 დღის წინ ლარსის გამშვებ პუნქტზე 5 00-დან 6 000-მდე ადამიანი იყო შემომსვლელი — ახლა ეს რიცხვი 10 000-მდე გაიზარდა, 40-45%-ით მოიმატა.
  • მისივე ცნობით, საზღვრის სხვა გამშვები პუნქტებიდან შემომსვლელთა რაოდენობა გაცილებით ნაკლებია.

გომელაურის თქმით, გაიზარდა საზღვრიდან გაბრუნებულთა რიცხვიც, თუმცა როგორც ჩანს, არა იმიტომ, რომ საქართველოს საზღვრის კვეთა გამკაცრდა.

  • "ლოგიკურია, თუ 100 კაცში 10-ს უკან ვაბრუნებდით, ახლა 1 000 კაცში პირობითად 100 გაბრუნდება უკან, მათემატიკაა ჩვეულებრივი", — განაცხადა მან.
  • რაც შეეხება რუსებისთვის საზღვრის ჩაკეტვას, მინისტრი ამ აზრს არ იზიარებს: "მოქალაქეები შემოდიოდნენ რუსეთის ყოველთვის და ახლა დავკეტოთ საზღვარი დღეს?"