რაიან გრანთამს, რომელიც გახმაურებულ ამერიკულ სერიალ რივერდეილში მონაწილეობდა, სასამართლომ სამუდამო პატიმრობა მიუსაჯა მას შემდეგ, რაც 2020 წელს მან საკუთარი დედა მოკლა. მსახიობს განაჩენის გამოტანიდან მხოლოდ 14 წლის შემდეგ შეუძლია შეწყალება და ვადაზე ადრე გათავისუფლება მოითხოვოს.

სასამართლომ 24 წლის რაინს ასევე სამუდამოდ ჩამოართვა იარაღის ტარების უფლება. იმ შემთხვევაშიც კი თუ ის ციხიდან ვადაზე ადრე გამოვა და მთელ ცხოვრებას საპატიმროში არ გაატარებს, მას მაინც არასდროს ექნება იარაღის ლეგალურად ტარების უფლება.

რაიან გრანთამმა დედა ცეცხლსასროლი იარაღით მოკლა, როდესაც ის პიანინოზე უკრავდა. როგორც სასამართლო პროცესიდან ირკვევა, გრანთამი ამ დროს მის უკან იდგა და დედას თავში ესროლა ტყვია. მკვლელობის ჩადენის შემდეგ რაინმა ვიდეოც ჩაწერა, რომელშიც დანაშაულს აღიარებდა და ამასთან ერთად დედის ცხედარიც აჩვენებდა.

ამის შემდეგ რაიანი კანადაში წასვლასა და პრემიერმინისტრის, ჯასტინ ტრუდოს, მოკვლას გეგმავდა, თუმცა გზაში გადაიფიქრა და ვანკუვერისკენ შეტრიალდა და გადაწყვიტა ძალადობა ჩაედინა სკოლაშიც, რომელშიც უწინ სწავლობდა. საბედნიეროდ, ეს გეგმაც გადაიფიქრა და იმავე ღამით ვანკუვერის პოლიციის განყოფილებაში მივიდა და დედის მკვლელობა აღიარა.

როგორც სასამართლო პროცესზე გაირკვა, მკვლელობის ჩადენის წინ რაიანი კლინიკური დეპრესიითა და ძალადობის ჩადენის მოთხოვნილებით იტანჯებოდა.

"მან უამრავი ფსიქოლოგიური კონსულტაცია გაიარა და განიცადა, რაც ჩაიდინა. უჭირდა თვალი გაესწორებინა საკუთარი ქმედებისთვის," — განაცხადა მისმა ადვოკატმა, — "მას იმედი აქვს, რომ შესაძლებლობა მიეცემა თავისი ცხოვრება მიუძღვნას დანაშაულის გამოსყიდვას."

თავად რაიან გრანთამმა კი განაცხადა: "გული მტკივა, როცა ვფიქრობ, რა ცუდად გავფლანგე ცხოვრება. ასეთი საშინელების ჩადენის შემდეგ, რომ ვთქვა 'ვწუხვარ', უაზრობად ჟღერს, მაგრამ მართლა მთელი არსებით ვწუხვარ."

რაიან გრანთამი მონაწილეობდა ისეთ ფილმებშიც, როგორიც Diary of a Wimpy Kid და Becoming Redwood არის.