გრიგოლ ნარსიასთან შეხვედრის შემდეგ ადვოკატმა პირველი კომენტარი გააკეთა.

რატომ არის მნიშვნელოვანი: შეიარაღებული პირი საქართველოს ბანკში გუშინ, 20 სექტემბერს შეიჭრა და მძევლად 14 ადამიანი აიყვანა.

  • ბანკიდან გავრცელებულ კადრებში ჩანდა, რომ ის მძევლებს მისი მოთხოვნების გაჟღერებას, ამბის გავრცელებას აიძულებდა.
  • თავდაპირველად 2 მილიონ დოლარს ითხოვდა — მოგვიანებით მოთხოვნები შეცვალა. მისი ახალი მოთხოვნები მილიონ ნახევარი და ორი მძევლის დატოვება იყო.
  • სპეცოპერაცია შეჭრიდან დაახლოებით 9 საათის შემდეგ დასრულდა და შსს-მ განაცხადა, რომ თავდამსხმელი დააკავეს, მძევლები კი თავისუფლები არიან.

დეტალები: ადვოკატის თქმით, ნარსიამ უთხრა, რომ ასაფეთქებლები არ ჰქონია და სათამაშო იყო — დაუდასტურა მხოლოდ ის, რომ ბანკში პნევმატიკური იარაღი ჰქონდა შეტანილი.

  • მისივე თქმით, დაკავებული ამბობს, რომ ფილიალში შვილის ჯანმრთელობასთან დაკავშირებული პრობლემის გამო შეიჭრა.
  • როგორც ადვოკატმა განაცხადა ნარსიას ჯერჯერობით ბრალი წაყენებული არ აქვს.

გამოძიება სისხლის სამართლის კოდექსის 144-ე, 236-ე, 323-ე და 329-ე მუხლებით მიმდინარეობს, რაც გულისხმობს:

  • მძევლად ხელში ჩაგდებას;
  • საბრძოლო მასალის მართლსაწინააღმდეგო შეძენა/შენახვა/ტარებას;
  • ტერორისტულ აქტს;
  • ტერორისტული მიზნით მძევლად ხელში ჩაგდებას.

არქივიდან: ბოლო რამდენიმე წლის განმავლობაში ბანკში შეიარაღებული შეჭრისა და ყაჩაღობის მცდელობის არაერთი შემთხვევა დაფიქსირდა, მათი ნაწილი საქართველოს ბანკში იყო.

  • ყველაზე გახმაურებული შემთხვევა ბადრი ესებუას უკავშირდება, რომელმაც ზუგდიდში მძევლები აიყვანა, რამდენიმე საათში კი მძევლებთან ერთად ბანკი დატოვა და გაიქცა.
  • შემთხვევის შედეგად არავინ დაშავებულა, ესებუა კი თანხასთან ერთად მიიმალა — როგორც შს მინისტრი ყოველ ჯერზე ამბობს, მას ეძებენ.