საქართველოს საგარეო საქმეთა მინისტრი, მიხეილ ჯანელიძე ამბობს, რომ თურქეთი საქართველოს სტრატეგიული პარტნიორია. ამის შესახებ ჯანელიძემ საქართველოში თურქეთის სამთავრობო დელეგაციის ჩამოსვლის შემდეგ ისაუბრა. დელეგაცია პრემიერ-მინისტრ ბინალი ილდირიმის ხელმძღვანელობით საქართველოში დღეს, 22 მაისს ჩამოვიდა.

"ჩვენთვის ძალიან მნიშვნელოვანია თურქეთის ძალიან მტკიცე მხარდაჭერა ჩვენი ტერიტორიული მთლიანობის, სუვერენიტეტისადმი, ჩვენი ევროატლანტიკური მისწრაფებისადმი. ვიზიტის ფარგლებში ხელი მოწერება რამდენიმე შეთანხმებას სხვადასხვა სექტორში, რაც ხაზს უსვამს, რომ ჩვენი ურთიერთობები ვითარდება დინამიურად და ორი ქვეყანა ძალიან დიდ ყურადღებას უთმობს ამ ურთიერთობების კიდევ უფრო გაღრმავებას,“ - აღნიშნა მიხეილ ჯანელიძემ და დასძინა, რომ წლების განმავლობაში საქართველომ და თურქეთმა სამაგალითო ურთიერთობა ჩამოაყალიბეს.

საგარეო საქმეთა სამინისტროში აღნიშნავენ, რომ ხვალ, 23 მაისს თურქეთის სამთავრობო ვიზიტის ფარგლებში საქართველო-თურქეთის მაღალი დონის სტრატეგიული თანამშრომლობის საბჭოს მეორე სხდომა გაიმართება. საქართველოსა და თურქეთს შორის სტრატეგიული თანამშრომლობის საბჭოს ფორმატი 2016 წელს ამოქმედდა. თუმცა, წელს საქართველოსა და თურქეთს შორის დიპლომატიური ურთიერთობების დამყარების 25 წლის იუბილე აღინიშნება.