24-დან 29 სექტემბრამდე ქუთაისის რიგით მეორე საერთაშორისო მოკლემეტრაჟიანი ფილმების ფესტივალი ქუთაისის მერიის, საქართველოს ეროვნული კინოცენტრისა და თიბისი კონცეპტის მხარდაჭერით ჩატარდება.

ფესტივალის მთავარი მასპინძელი სასტუმრო ქუთაისი-ინნ არის.

ფესტივალი საზეიმოდ გაიხსნება 24 სექტემბერს, 18 საათზე, კინოთეატრ საქართველოში. გახსნის ცერემონიის შემდეგ ნაჩვენები იქნება მიხეილ კობახიძის ქორწილი.

ექვსი დღის განმავლობაში, ფესტივალი კინოთეატრ საქართველოში ფართო აუდიტორიას შესთავაზებს მრავალფეროვან პროგრამას. ფესტივალის პროგრამა კინოჩვენებებთან/ რეტროსპექტივებთან ერთად, უშუალოდ კინემატოგრაფებისთვის განკუთვნილ საგანმანათლებლო ღონისძიებებს, მასტერკლასებს, დისკუსიებს და პრეზენტაციებს მოიცავს.

მოკლემეტრაჟიანი მხატვრული ფილმების ჟიურის წევრები არიან: ნანა ჯორჯაძე (თავმჯდომარე), ალექსანდრე კობერიძე, კატია კრაუსოვა, გალინა სულიმა და ედვინას პუკშტა. რაც შეეხება მოკლემეტრაჟიანი დოკუმენტური ფილმების ჟიურის, თავჯდომარე ინეკე სმიტსია, წევრები კი — კოტე კალანდაძე და გიორგი ბოჭორიშვილი. გამარჯვებულს ორ კატეგორიაში გამოავლენენ: საუკეთესო ფილმი და საუკეთესო რეჟისორი. პრიზიორს გადაეცემა ფესტივალის ჯილდო — ოქროს დინოზავრი.

ფესტივალზე აგრეთვე იმუშავებს კინოკრიტიკოსების ჟიური: ლელა ოჩიაური (თავმჯდომარე), თეო ხატიაშვილი და ბასტი მგალობლიშვილი. ისინი თავიანთ რჩეულს გადასცემენ მიხეილ კობახიძის სახელობის ჯილდოს.

ფესტივალის საპატიო სტუმარი იქნება ბერძნული წარმოშობის ამერიკელი კინოოპერატორი და რეჟისორი ფედონ პაპამაიკლი, რომელიც მრავალი პრესტიჟული კინემატოგრაფიული ჯილდოს მფლობელია. ფესტივალის ფარგლებში შედგება მისი მოკლემეტრაჟიანი ფილმის მშვენიერი დღე ქართული პრემიერა და შეხვედრა-სემინარი ავტორთან.

ფესტივალის წლევანდელი ფოკუს ქვეყანა უკრაინაა. უკრაინული კულტურის განვითარებისა და მხარდაჭერის საერთაშორისო ფონდისა და ფრანგულ-უკრაინული ახალგაზრდული კინოფესტივალის МIСТ მხარდაჭერით, ნაჩვენები იქნება თანამედროვე უკრაინული მოკლემეტრაჟიანი ფილმებიც.

გოეთეს ინსტიტუტის მხარდაჭერით წარმოდგენილი იქნება ობერჰაუზენის საერთაშორისო მოკლემეტრაჟიანი ფილმების ფესტივალის პროგრამა, რომელიც სპეციალურად ფესტივალისათვის არის შექმნილი და რომელსაც წარმოადგენს ფესტივალის აღმოსავლეთ ევროპის ქვეყნების კურატორი — ქრისტიანე ბიუხნერი.

იონას მეკასის დაბადებიდან 100 წლისთავის აღსანიშნავად, საქართველოში ლიეტუვის საელჩოსთან და CinExpress-თან თანამშრომლობით ნაჩვენები იქნება მისი ფილმები.

საქართველოს ეროვნული არქივი წარადგენს პროგრამას "ქუთაისი და წყალტუბო საბჭოთა კინოქრონიკაში". აგრეთვე, კინოარქივისა და საქართველოს კინოცენტრის ხელშეწყობით, ნაჩვენები იქნება აღდგენილი ქართული კინომემკვიდრეობა: მაგდანას ლურჯა და ალავერდობა.

რეჟისორი ფოკუსში — ოთარ იოსელიანია. ნაჩვენები იქნება მისი ფართო აუდიტორიისთვის ნაკლებად ცნობილი მოკლემეტრაჟიანი ფილმები.

პირველად ქუთაისში შესაძლებლობა გექნებათ, ნახოთ შარშანდელი ბერლინალეს ტრიუმფატორი რეჟისორის, ალექსანდრე კობერიძის, მოკლემეტრაჟიანი ფილმებიც.

ტრადიციულად, ფესტივალზე იქნება წარმოდგენილი ქართული მოკლემეტრაჟიანი ფილმების პანორამა.

ფესტივალის ფარგლებში ჩატარდება ქართველი მხატვრისა და დიზაინერის გუგა კოტეტიშვილის მასტერკლასი "ფერი კინოში"; სლოვაკური წარმოშობის ბრიტანელი პროდიუსერისა და რეჟისორის, კატია კრაუსოვას, მასტერკლასი "კრეატიული პროდიუსერი და საერთაშორისო კო-პროდუქცია", ქართველი მსახიობების და ქასთინგის რეჟისორების, ეკა მჟავანაძისა და თეკლა ჯავახაძის, მასტერკლასი "მსახიობი და თანამედროვე კინოს გამოწვევები".

ფესტივალის ფარგლებში იმუშავებს მოკლემეტრაჟიანი ფილმის სცენარის განვითარების ვორქშოპი. მისი ხელმძღვანელები არიან: სცენარისტი, რეჟისორი და პროდიუსერი ლეო გაბრიაძე, რეჟისორი ალექსანდრე კობერიძე, სცენარისტი და რეჟისორი უტა ბერია და პროდიუსერი თიკო ნადირაშვილი.

საზოგადოებრივმა მაუწყებელმა გამარჯვებული პროექტისთვის დააწესა ფულადი ჯილდოც — 5 000 ლარი, რომელიც 2 საუკეთესო სცენარზე გადანაწილდება.პირველ ადგილზე გასული დაჯილდოვდება 3 000 ლარით, მეორე ადგილზე გასული კი — 2 000 ლარით.

ფესტივალის საზეიმო დახურვა და ლაურეატების დაჯილდოება შედგება 29 სექტემბერს, 19 საათზე, კინოთეატრ საქართველოში. ოფიციალური ნაწილის შემდეგ ნაჩვენები იქნება მიხეილ კობახიძის მუსიკოსები.

ფესტივალის პროგრამის შესახებ დეტალურ ინფორმაციას ამ ბმულზე იხილავთ.