ამის შესახებ ინფორმაციას ბრიტანეთის თავდაცვის სამინისტროს სადაზვერვო სამსახური ავრცელებს.

რატომ არის მნიშვნელოვანი: რუსეთი ყოველდღიურად დიდი რაოდენობის საბრძოლო აღჭურვილობას კარგავს — ამ ინფორმაციას უკრაინის გენერალური შტაბი მუდმივ რეჟიმში აახლებს.

  • 29 აგვისტოს შემდეგ უკრაინა კონტრშეტევაზე გადავიდა, რამაც თავის მხრივ, რუსეთის შეიარაღებული ძალების დანაკარგები გაზარდა, მათი შესაძლებლობები კი შეამცირა;
  • დასავლეთის მხრიდან ყოველმხრივ სანქცირებული რუსეთის ერთადერთი წყარო ასევე სანქცირებული ქვეყნებია.

დეტალები: აგვისტოს ბოლოს ცნობილი გახდა, რომ ირანმა რუსეთს საბრძოლო დრონები გაუგზავნა, თუმცა ტრანსპორტირების დროს ხარვეზები დაფიქსირდა.

  • სადაზვერვო სამსახურის ცნობით, ეს დრონები რუსეთმა, სავარაუდოდ, 13 სექტემბერს პირველად გამოიყენა, თუმცა უკრაინული მხარის ინფორმაციით, Shahed-136 ჩამოაგდეს;
  • უწყების განცხადებით, ამ დრონის დაკარგვა მიუთითებს, რომ რუსეთი, შესაძლოა, სისტემას ტაქტიკური დარტყმების განსახორციელებლად იყენებს და არა უკრაინის ტერიტორიაზე სტრატეგიული სამიზნეებისთვის.

აშშ-ის დაზვერვის ცნობით, რუსეთი ჩრდილოეთ კორეისგან მილიონობით საარტილერიო ჭურვებსა და რაკეტებს ყიდულობს, რაც მიანიშნებს, რომ სანქციებმა მისი შესაძლებლობები შეასუსტა.

  • NYT აშშ-ის ოფიციალურ პირზე დაყრდნობით წერს, რომ ჩრდილოეთ კორეასთან ეს შეთანხმება მოსკოვის სასოწარკვეთას აჩვენებს;
  • სამხედრო ექსპერტის, ფრედერიკ კაგანის თქმით კი, ჩრდილოეთ კორეასთან საქმის დაჭერა იმის ნიშანია, რომ როგორც ჩანს, კრემლს ომის წარმართვისთვის საჭირო უმარტივესი მასალის წარმოებაც კი არ შეუძლია.