სიაში არიან ქართული ოცნების დამფუძნებელთან დაახლოებული პირები, მისი ოჯახის წევრები, ყოფილი მაღალჩინოსნები და ბიზნესმენები.

რატომ არის მნიშვნელოვანი: უკრაინაში ომის დაწყების შემდეგ სანქციებთან მიმართებაში ბიძინა ივანიშვილის სახელი არაერთხელ გაჟღერდა, თუმცა არცერთ ქვეყანას ამ მიმართულებით ნაბიჯები არ გადაუდგამს.

• ოპოზიცია და საერთაშორისო პარტნიორები, მათ შორის უკრაინის ხელისუფლებიდან და ევროპარლამენტიდან, ამის აუცილებლობაზე საუბრობდნენ.
• ამ პლატფორმაზე ივანიშვილის და სხვების სახელების გამოჩენამ, შექმნა მოლოდინი, რომ, შესაძლოა, სანქციები დაუწესდეთ და ბევრი უპასუხო კითხვაც გააჩინა.

რა ვიცით პლატფორმაზე: აუცილებელია აღვნიშნოთ, რომ ამჯერად გამოქვეყნდა არა უკვე სანქცირებულთა, არამედ იმ პირთა სია, ვისთვის დაწესებასაც ითხოვენ.

• ვებგვერდს ომი და სანქციები ქვია — ის უკრაინის საგარეო საქმეთა სამინისტროსა და ანტიკორუფციული სააგანტოს მხარდაჭერითაა შექმნილი.
• დახასიათებიდან ვიგებთ, რომ ეს არის პორტალი, სადაც შეგიძლიათ მარტივად იპოვოთ ადამიანი ან კომპანია, რომელიც, თქვენი აზრით, ყველაზე მეტად იმსახურებს სანქციებს და მოუწოდოთ პასუხისმგებელ პირებს, რომ ისინი შესაბამის სიაში შეიყვანონ.
• ასევე, განმარტავენ, რომ ის შექმნილია, რათა უკრიანის პარტნიორებსა და მოკავშირეებს სასარგებლო ინფორმაცია მიაწოდონ სამიზნეების მოსაძებნად.
• კანდიდატების შეყვანა შეუძლია ყველას — მითითებულ მეილზე უნდა გაგზავნო იმ პირის ან კომპანიის ინფორმაცია, ვისი სანქცირებაც გსურს, მას განიხილავენ და საფუძველის არსებობის შემთხვევაში, გაუგზავნიან პასუხისმგებელ პირებს.

ვინ მოხვდა სიაში: ბიძინა ერთადერთი ივანიშვილი არ არის, ვის გვარსაც ამ პლატფორმაზე ნახავთ. აქვე წერია მისი ძმაზე, ალექსანდრ ივანიშვილზე.

• გარდა ამისა, ქართული ოცნების დამფუძნებლის ნათესავები უჩა და ტატე მამაცაშვილები, ქეთევან ხარაიძე და მათი პარტნიორი გიორგი კაპანაძე;
• ასევე, თავად ივანიშვილის პარტნიორი, ირაკლი რუხაძე;
• აქვე ნახავთ ცნობილ ბიზნესმენებს, დავით ხიდაშელს, ლევან ვასაძეს, ვანო ჩხარტიშვილს;
• და ყოფილ მაღალჩინოსნებს, ოთარ ფარცხალაძეს, სულხან პაპაშვილს.

რატომ ითხოვენ მათ სანქცირებას: პლატფორმაზე ყველა პირის შესახებ მოკლე დახასიათებაა წერია, სადაც სიაში შეყვანის აუცილებლობაა განმარტებული.

• მაგალითად, ჰომოფობი და მოძალადე ჯგუფების ლიდერი, წარსულში რუსეთში მოღვაწე ბიზნესმენი, ლევან ვასაძე აღწერილია, როგორც პუტინის პროპაგანდისტის, ალექსანდრ დუგინის ახლო მოკავშირე;
• ყოფილი გენერალური პროკურორი, ოთარ ფარცხალაძე ოლიგარქიული მმართველობის და ივანიშვილის მიერ სახელმწიფოს მიტაცების ერთ-ერთ მონაწილედაა დახასიათებული;
• დავით ხიდაშელი კი ივანიშვილის პარტნიორად და ბიზნესმენად, რომლის კომპანიების შემოსავალი აძლიერებს რუსეთის ბიუჯეტს.

რას წერენ ივანიშვილზე: მის დახასიათებაში ვკითხულობთ, რომ საქართველოს არაფორმალური მმართველია და ახლო კავშირები აქვს რუსულ პოლიტიკურ ელიტასთან.

• ნათქვამია, რომ ეხმარებოდა რუს ოლიგარქ ვლადიმერ ევტუშენკოვს საქნციებზე თავის არიდებაში;
• ასევე, ბიზნესინტერესები აქვს სანქტ-პეტერბურგის სანქცირებულ გუბერნატორსა და მოსკოვის დუმის დეპუტატთან.

ვინ რა თქვა საქართველოში: რა თქმა უნდა, მმართველმა გუნდმა ეს "აბსურდულად" შეაფასა.

• ირაკლი კობახიძემ განაცხადა, რომ ამაში ახალი არაფერია, რადგან უკრაინის ხელისუფლების კონკრეტულმა წარმომადგენლებმა აქამდეც გააკეთეს განცხადებები.
• დროას ლიდერის, ელენე ხოშტარიას შეფასებით, ეს საერთაშორისო, დიდი ავტორიტეტით მოსარგებლე პლატფორმაა და სანქცირებაზე საბოლოო გადაწყვეტილების მიღებისას დასავლელი პარტნიორები ამით ხელმძღვანელობენ.
• ლელოს წევრის, სალომე სამადაშვილის განცხადებით, კი ეს არის პირველი ხელშესახები ნიშანი იმისა, რაზეც დიდი ხანია ლაპარაკობენ.
• სიაში მყოფი დავით ხიდაშელი ამ მოთხოვნას "პროვოკაციებსა და აფერისტობებს" უწოდებს.