მსოფლიოს არაერთმა ლიდერმა უკრაინას დამოუკიდებლობის დღე მიულოცა და მხარდამჭერი პოსტები გამოაქვეყნეს.

რატომ არის მნიშვნელოვანი: 1991 წლის 24 აგვისტოს უკრაინამ დამოუკიდებლობა მოიპოვა.

• დღეს ქვეყანა კვლავ შეუპოვრად იბრძვის რუსული აგრესიის წინააღმდეგ.

ბორის ჯონსონმა Twitter-ზე ვიდეო გამოაქვეყნა, რომელშიც უკრაინას ეს დღე მიულოცა.

• "დღეს უკრაინის დამოუკიდებლობას კიდევ ერთხელ ემუქრება საფრთხე. მისი ხალხი იბრძვის სიმამაცით და გამბედაობით, რათა დაიცვან თავიანთი სახლები, ოჯახები და შეინარჩუნონ უფლება, გადაწყვიტონ საკუთარი ბედი საკუთარ ქვეყანაში".
• "ერთი წუთითაც არ შემპარვია ეჭვი, რომ უკრაინა ამ ბრძოლაში გაიმარჯვებს, რადგან დედამიწაზე ვერც ერთი ძალა ვერ დაამარცხებს 44 მილიონი უკრაინელის პატრიოტიზმს".

ურსულა ფონ დერ ლაინმა უკრაინის დროშის ფერებში განათებული ევროკომისიის შენობის ფოტო გამოაქვეყნა.

• "ამ ღამით ევროკომისიის შენობაზე ამაყად ჩანს ყვითელი და ლურჯი, რათა გამოვხატოთ ჩვენი მხარდაჭერა უკრაინის მიმართ".
• "ამაყად ვდგავართ ჩვენი უკრაინელი მეგობრების გვერდით თავისუფალი, დამოუკიდებელი და ევროპული მომავლისთვის ბრძოლაში".

მაია სანდუმ დაწერა, რომ მოლდოვა უკრაინის გვერდით დგას და მშვიდობასა და კეთილდღეობას უსურვებს.

• "უკრაინის დამოუკიდებლობის დღეს, ჩვენ აღფრთოვანებული ვართ უკრაინელი ხალხის — საკუთარი სახლის დამცველებისა და თავისუფლებისთვის, დამოუკიდებლობისა და დემოკრატიისთვის მებრძოლების სიმამაცითა და დაუმორჩილებლობით".
• "თქვენ ხართ შთაგონება მომავალი თაობებისთვის".

სანა მარინი ფეისბუქზე წერს, რომ გულითადად ულოცავს უკრაინას და უკრაინელ გმირ ხალხს დამოუკიდებლობის დღეს.

• "ომის დაწყებიდან 6 თვე გავიდა. ამან ბევრი ტანჯვა, მწუხარება და ტკივილი მოიტანა, თუმცა, აგრეთვე, ერთიანობა, სიძლიერე, ნებისყოფა და მონდომება".
• "უკრაინელი ხალხი მამაცი და შეუპოვარია. ჩვენ მათ გვერდით ვართ და ვიქნებით. ჩვენ არ დავივიწყებთ უკრაინასა და უკრაინელ ხალხს".

ოლაფ შოლცმა უკრაინას დამოუკიდებლობის დღე, ასევე, ვიდეომიმართვით მიულოცა.

• "უკრაინა დამოუკიდებელია 1991 წლის 24 აგვისტოდან — უკრაინელებისთვის დღეს ეს დღესასწაულია საშინელ პირობებში".
• "ზუსტად 6 თვე გიწევთ, გაბედულად დაიცვათ თქვენი დამოუკიდებლობა რუსული თავდასხმისგან. ჩვენი გული თქვენთანაა".

რობერტა მეცოლა წერს, რომ უკრაინის დამოუკიდებლობის დღის მნიშვნელობა წელს უფრო დამაჯერებელია, ვიდრე ოდესმე.

• "ძლიერი და მამაცი უკრაინელები იბრძვიან თავიანთი სიცოცხლის, ოჯახების, ქვეყნის, ღირებულებების, არჩევანისა და თავისუფლებისთვის. მათი დამოუკიდებლობისთვის".
• "ევროკავშირი ყოველთვის უკრაინის გვერდით იქნება. ჩვენი მხარდაჭერა აქ არ შეჩერდება".

გიტანას ნაუსედამ კიევში ვიზიტისას ვოლოდიმირ ზელენსკისთან გადაღებული ფოტო გამოაქვეყნა.

• "ვუსურვებ სიძლიერეს ვოლოდიმირ ზელენსკის და უკრაინელ ერს, რომელიც თავისუფლებისთვის იბრძვის წარმოუდგენელი გამბედაობით, დაუმორჩილებლობით და ღირსებით".

• "ლიეტუვა ყოველთვის თქვენთანაა".

იენს სტოლტენბერგმა დამოუკიდებლობის დღე უკრაინას სხვა ლიდერების მსგავსად ვიდეომიმართვით მიულოცა.

• "უკრაინის დამოუკიდებლობის დღეს პატივს მივაგებთ მამაც უკრაინელ ქალებსა და კაცებს, რომლებიც იბრძვიან თავიანთი თავისუფლებისა და ქვეყნისთვის".
• "ნატო მხარს უჭერს უკრაინას მისი დამოუკიდებლობის დღიდან და შეგიძლიათ გქონდეთ ნატოს იმედი რამდენ ხანსაც დაგჭირდებათ".
• "უკრაინა გაიმარჯვებს!"

შარლ მიშელმა უკრაინელ ხალხს მიმართა, რომ დღეს არ არის დღე, როდესაც შეგვიძლია მათ ვუსურვოთ ბედნიერი დამოუკიდებლობის დღესასწაული, რადგან ისინი იტანჯებიან და იბრძვიან.

• "თქვენ იბრძვით სამშობლოს დასაცავად, თქვენი ქვეყნისა და შვილების მომავლის დასაცავად. მაგრამ, თქვენ, ასევე, იბრძვით ჩვენი საერთო ევროპული ღირებულებებისა და პრინციპების დაცვისთვის".
• "სწორედ ამიტომ თქვენი ოჯახის წევრები ჩვენი ოჯახის წევრები არიან, თქვენი მომავალი, ჩვენი საერთო მომავალია".

ემანუელ მაკრონმა ასევე ვიდეომიმართვა გაავრცელა.

• "უკრაინა, საფრანგეთის სახელით, დამოუკიდებლობის დღეს გიგზავნით მეგობრობის გზავნილს", — წერს ის.