აშშ-ის პრეზიდენტმა დონალდ ტრამპმა განაცხადა, რომ თითოეულ სრულწლოვან ამერიკელს 5 000 აშშ დოლარს გადაუხდის, თუ რესპუბლიკური პარტია ნოემბრის შუალედური არჩევნების შემდეგ წარმომადგენელთა პალატასა და სენატზე კონტროლს შეინარჩუნებს.

აღნიშნული ინიციატივის შესახებ ტრამპმა ტეხასის შტატში, დალასში გამართულ რესპუბლიკური პარტიის ყრილობაზე სიტყვით გამოსვლისას ისაუბრა.

"თუ რესპუბლიკელები მოიგებენ წარმომადგენელთა პალატასა და აშშ-ის სენატს — ორივეს, ჩვენი უზარმაზარი ეკონომიკური წარმატების წყალობით […] მე ამერიკის შეერთებული შტატების თითოეულ სრულწლოვან მოქალაქეს 5 000 აშშ დოლარის ოდენობის დივიდენდს გადავცემ", — განაცხადა ტრამპმა.

აშშ-ის პრეზიდენტმა განმარტა, რომ ეს იქნება "ძალიან მსგავსი იმისა, რასაც წარმატებული კომპანია აკეთებს, როდესაც აქციონერებზე ნაღდ ფულს ანაწილებს".

ამასთან, ტრამპის თქმით, გადახდის ერთადერთი პირობა იქნება ის, რომ თანხა ექსკლუზიურად შეერთებული შტატების ტერიტორიაზე უნდა დაიხარჯოს.

"ჩვენ არ გვინდა, რომ თქვენ კანადაში წახვიდეთ", — დასძინა მან.

გაურკვეველი რჩება დაფინანსების წყარო, ფულის დახარჯვის მონიტორინგის მექანიზმები და ასეთი გადახდების კანონიერება.

ცნობისთვის, 2025 წელს აშშ-ის სრულწლოვანი მოსახლეობა დაახლოებით 267 მილიონს შეადგენდა, რაც იმას ნიშნავს, რომ გადახდების საერთო ღირებულება 1.3 ტრილიონ აშშ დოლარს გადააჭარბებს. აღსანიშნავია ისიც, რომ ტრამპი ტრილიონობით დოლარის დარიგების პირობას იძლევა იმ ფონზე, როდესაც მისი პრეზიდენტობის დროს აშშ-ის სახელმწიფო ვალმა ისტორიაში ყველაზე მაღალ ნიშნულს მიაღწია და 40 ტრილიონ აშშ დოლარს გადააჭარბა.

გამოსვლისას ტრამპმა აღნიშნა, რომ ნოემბერში რესპუბლიკელების დამარცხება ნიშნავს, რომ ამერიკელები "დაკარგავენ საზღვარს, დაკარგავენ საგადასახადო შეღავათებს, დაკარგავენ უსაფრთხოებასა და დაცულობას".

"თქვენ ჯოჯოხეთის გავლა მოგიწევთ, ისევე როგორც ეს სულ რაღაც ორი წლის წინ გაიარეთ", — განაცხადა აშშ-ის პრეზიდენტმა.