უკრაინულმა მხარემ დაღესტანში, მახაჭყალის პორტზე დრონებით იერიში მიიტანა. ამის შესახებ ინფორმაცია უკრაინის პრეზიდენტმა ვოლოდიმირ ზელენსკიმ "ტელეგრამზე" დაადასტურა.

მისი თქმით, გასული დღე-ღამის განმავლობაში უკრაინელმა მეომრებმა რუსეთის ინფრასტრუქტურის რვა ისეთ ობიექტზე მიიტანეს იერიში, რომლებიც საომარ მოქმედებებს უზრუნველყოფს.

"დარტყმები განხორციელდა ნავთობგადამამუშავებელ ქარხანაზე იამალ-ნენთა ავტონომიურ რეგიონში და საზღვაო პორტზე დაღესტანში. ასევე დარტყმები განხორციელდა მოსკოვის, ვორონეჟის, ასტრახანისა და ბრიანსკის ოლქებში. რუსეთი აგრძელებს უკრაინის წინააღმდეგ ყოველდღიურ ტერორს და ყოველდღიურადვე იღებს სათანადო პასუხს. მადლობას ვუხდი თითოეულ მეომარს და ყველას, ვინც უზრუნველყოფს ჩვენს შესაძლებლობებს შორი მოქმედების და მაღალი სიზუსტის დარტყმების განსახორციელებლად", - წერს ვოლოდიმირ ზელენსკი.

როგორც meduza წერს, დაღესტნის რეგიონული მთავრობის ხელმძღვანელის მოვალეობის შემსრულებელმა ფიოდორ შჩუკინმა განაცხადა, რომ ერთ-ერთი დრონი თეატრის შენობას დაეცა. მისი თქმით, იერიშის შედეგად დრამის თეატრის ფანჯრები ჩაიმსხვრა და ხანძარი გაჩნდა.

შჩუკინის თქმით, ამჯერად ხანძარი ლიკვიდირებულია.

ცნობისთვის, რუსეთის თავდაცვის სამინისტრომ განაცხადა, რომ საჰაერო თავდაცვის ძალებმა ღამით სხვადასხვა რეგიონში 448 უკრაინული დრონი ჩამოაგდეს.