სატელიტური ფოტოები ამერიკული გამოცემა Politico-ს ჟურნალისტმა ქრისტოფერ მილერმა გამოაქვეყნა.

რატომ არის მნიშვნელოვანი: 29 ივლისს აფეთქდა კოლონია, სადაც რუსებს უკრაინელი ტყვეები ჰყავდათ, მათ შორის აზოვიდან. ადგილზე 193 ადამიანი იყო, დაბომბვას 53 უკრაინელი ჯარისკაცის სიცოცხლე ემსხვერპლა, 75 კი დაშავდა.

  • უკრაინა აცხადებს, რომ რუსეთმა კოლონია პატიმრების წამებისა და მკვლელობის დასაფარად დაბომბა, მანამდე კი იქ აზოვის დატყვევებული მებრძოლები გადაიყვანა.
  • ოკუპანტები ციხეზე თავდასხმაში უკრაინას ადანაშაულებენ და ამბობენ, თითქოს შენობა ამერიკიდან მიღებული HIMARS რაკეტით დაიბომბა.

დეტალები: სატელიტის ფოტოები თავდასხმამდე — 27 ივლისსა და აფეთქების შემდეგ, 30 ივლისსაა გადაღებული. ფოტოებში ჩანს, რომ ადგილზე მხოლოდ ერთი შენობაა დაზიანებული.

  • უკრაინული მედია წერს, რომ თავდასხმის შემდეგ გადაღებულ ფოტოზე ჩანს შემდეგი — ციხის სახურავი შიგნიდანაა დაზიანებული და შენობის სახურავზე არ ჩანს ისეთი დაზიანების ნიშნები, რასაც HIMARS-ის რაკეტით თავდასხმა გამოიწვევდა.
  • იგივეს ამბობს უკრაინის პრეზიდენტის ადმინისტრაციის უფროსის მრჩეველი მიხაილო პოდოლიაკი.

უკრაინსკა პრავდა საერთაშორისო სადაზვერვო საზოგადოება InformNapalm-ზე დაყრდნობით წერს, რომ თავდასხმა არ განხორციელებულა HIMARS-ით.

  • InformNapalm განმარტავს, რომ "რაკეტის დარტყმის" კვალი არ არის. საუბრობენ, რომ ცხედრები სარაკეტო თავდასხმის შემდეგ არ დაიწვებოდა.
  • "გამომძიებლები თვლიან, რომ ეს იყო ბომბი, ანუ ისინი უბრალოდ ფანჯრებიდან ესროლეს შენობაში და ყველა გასასვლელი გადაკეტეს".

პოდოლიაკის თქმით, სატელიტური სურათებიდან ჩანს, რომ მხოლოდ ერთი შენობაა დაზიანებული.

  • "ფოტოანალიზი აჩვენებს აფეთქებას შიგნიდან".

ფოტო 1: maxar / ფოტო 2: maxar

გაერო მზადაა გამომძიებლები გაგზავნოს უკრაინელი ტყვეების დახოცვის ადგილზე.

  • პრესმდივნის, ფარჰან ჰაქის თქმით ეს ორივე მხარის თანხმობით უნდა მოხდეს.
  • უკრაინის პრეზიდენტიმ, ვოლოდიმირ ზელენსკიმ პირდაპირ თქვა, რომ გაეროსა და წითელი ჯვრის საერთაშორისო კომიტეტის მოვალეობაა რეაგირება მოახდინონ ოლენივკის თავდასხმაზე.
  • რუსეთი ამტკიცებს, რომ მიიწვია გაეროს და წითელი ჯვრის ექსპერტები ციხეში სიკვდილის გამოსაძიებლად

აზოვის შურისძიება: პოლკი ნადირობას იწყებს ყველაზე, ვინც უკრაინელი ტყვეების დაბომბვაში მონაწილეობდა.

  • პოლკის მეთაურის დროებითი მოვალეობის შემსრულებელი, მაიორი მიკიტა ნადტოჩი აცხადებს, რომ დღეების განმავლობაში რუსეთი უკრაინის არმიაზე სიცრუეს ავრცელებდა.