მოგეხსენებათ, რამდენიმე დღეა მსოფლიო ჰაკერების შეტევებს იგერიებს და ათასობით კომპიუტერი ე.წ. Ransomware-ის მსხვერპლი გახდა. ასევე ვრცელდება ინფორმაცია, რომ ჰაკერების თავდასხმის ობიექტი დისნეიც გახდა და კიბერდამნაშავეებმა კარიბის ზღვის მეკობრეების ახალი ნაწილი, Pirates of the Caribbean: Dead Man Tell No Tales მოიპარეს და კომპანიას აშანტაჟებენ.

დისნეი აღნიშნულ ინფორმაციას ოფიციალურად არ ადასტურებს, მაგრამ გავრცელებული ინფორმაციით, კომპანიის CEO ბობ იგერი თანამშრომლებს შეხვდა და პრობლემის შესახებ მოუთხრო. ამავე შეხვედრაზე გაირკვა, რომ ჰაკერები, თუ კომპანია გამოსასყიდის გადახდაზე უარს იტყვის, თავიდან ფილმის 5 წუთიან მონაკვეთს გაავრცელებენ, ხოლო თუ დისნეი კიდევ არ გადაიხდის, მაშინ 20-20 წუთიან მონაკვეთებს დადებენ.

არსებული ინფორმაციით, დისნეი გამოსასყიდის გადახდას, რომელიც ძალიან დიდი თანხაა, არ აპირებს და ფედერალურ ბიუროსთან ერთად პრობლემის მოგვარებაზე მუშაობს.