იუსტიციის სამინისტროს მონაცემთა გაცვლის სააგენტოს კომპიუტერულ ინციდენტებზე რეაგირების ჯგუფი საქართველოში და მსოფლიოს სხვა ქვეყნებში Ransomware WannaCrypt/WannaCry ვირუსის გავრცელებასთან დაკავშირებით განცხადებას ავრცელებს და მისგან თავის დასაცავად მომხმარებლებსა და ორგანიზაციებს რეკომენდაციებით მიმართავს.

მონაცემთა გაცვლის სააგენტო, ვირუსისგან თავის დასაცავად, ორგანიზაციებს ოპერაციული სისტემების განახლებას ურჩევს:

"კერძოდ, ისარგებლონ კორპორაცია Microsoft-ის უსაფრთხოების MS17-010 ბიულეტენით რეკომენდებული განახლებით".

კომპიუტერულ ინციდენტებზე რეაგირების ჯგუფი მომხმარებლებს მოუწოდებს, კომპიუტერული ვირუსის მოსაგერიებლად დაიცვან სამი რეკომენდაცია:

  • განაახლონ ოპერაციული სისტემები და პროგრამული უზრუნველყოფა;
  • არ გახსნან საეჭვო და უცნობი მისამართებიდან ელექტრონული ფოსტით მიღებული ფაილები; ასევე, ყურადღებით მოეკიდონ ნაცნობი მისამართებიდან გამოგზავნილ ფაილებს და გახსნან ისინი მხოლოდ იმ შემთხვევაში, თუკი დარწმუნებული არიან მათ უტყუარობაში;
  • ყოველთვის იქონიონ მათთვის მნიშვნელოვანი ინფორმაციის სარეზერვო ასლები და დარწმუნდნენ, რომ გაკეთებული ასლები არ არის დაზიანებული და მათგან შესაძლებელია ინფორმაციის აღდგენა.

მონაცემთა გაცვლის სააგენტოს ინფორმაციით, ამ რეკომენდაციების დაცვა მნიშვნელოვნად ამცირებს ორგანიზაციებისა და მოქალაქეების რისკს, დაზარალდნენ კონკრეტულად WannaCrypt ან ნებისმიერი სხვა კიბერვირუსისაგან.

WannaCrypt ვირუსი კომპიუტერულ ქსელში 12 მაისიდან ვრცელდება. გლობალურმა ჰაკერულმა შეტევამ 150-ზე მეტი ქვეყნის 200 000-მდე ობიექტი უკვე დააზიანა.