პრემიერმინისტრი ევროპარლამენტის მიერ მიღებულ რეზოლუციას აკრიტიკებს და წერს, რომ ქართული ოცნების დამფუძნებელთან დაკავშირებით გაკეთებული ჩანაწერები არ ეფუძნება არავითარ დასაბუთებას და საქართველოში მოქმედი მმართველობის სისტემის დისკრედიტირებას ისახავს მიზნად.

რატომ არის მნიშვნელოვანი: 9 ივნისს ევროპარლამენტმა რეზოლუცია მიიღო, სადაც საქართველოში არსებული მედიაგარემო კრიტიკულადაა შეფასებული, ასევე, შეშფოთებაა გამოხატული მთავრობის დამოკიდებულებაზე.

• ტექსტის ერთ-ერთი ყველაზე მნიშვნელოვანი პუნქტი ბიძინა ივანიშვილისთვის სანქციების დაწესების მოწოდებას და მის კრემლთან ურთიერთობას ეხება;
• რეზოლუცია საქართველოს მთავრობას ზოგადი პრინციპებისა და მოვალეობების დაცვისკენ მოუწოდებს, ამასთანავე მასში განხილულია კონკრეტული საკითხები, რაზეც ხელისუფლებას შესაბამისი რეაგირება უნდა ჰქონდეს.

დეტალები: ღარიბაშვილის თქმით, ოპონენტებს არასოდეს წარმოუდგენიათ პოლიტიკაში თუ მართლმსაჯულებაში ბიძინა ივანიშვილის ჩარევის არცერთი ფაქტი.

• "ის საქართველოში აღარ აწარმოებს ეკონომიკურ საქმიანობას, არ არსებობს რუსეთთან მისი პირადი თუ საქმიანი კავშირის რაიმე პრეცედენტი"
• "შესაბამისად, ყველაფერი, რაც რეზოლუციაში არაფორმალურ მმართველობასთან დაკავშირებით ჩაიწერა, სრული სიყალბეა".

ღარიბაშვილი იმეორებს, რომ არაფორმალური მმართველობის შესახებ განცხადებები პირადად მისთვის განსაკუთრებით შეურაცხმყოფელია. მისი თქმით, ამაზე საუბარი შეურაცხყმოფელია ქვეყნისთვისაც.

• "გარდა ამისა, რეზოლუციის ჩანაწერები გამოიყენება ოპოზიციის რადიკალური ნაწილის მიერ საქართველოში პოლარიზაციის კიდევ უფრო გასაღრმავებლად და შესაბამისად, ჩემი ქვეყნისთვის ამ თვალსაზრისითაც პრობლემურია";
• "ასევე, რეზოლუცია პირდაპირ იქნა გამოყენებული შვეიცარიული ბანკის მიერ ბიძინა ივანიშვილის ფინანსური გადარიცხვების შესაჩერებლად. შესაბამისად, ბანკი ევროპარლამენტის დოკუმენტს იყენებს საქართველოს ყოფილი პრემიერმინისტრის კანონიერი უფლებების შესალახად, რაც, ასევე, ქვეყნის დისკრედიტაციას ახდენს".

"თხოვნა" ლაიენს: პრემიერმინისტრის თქმით, ევროპარლამენტის რეზოლუციის "უარყოფითი გავლენის" სრულად გასანეიტრალებლად, მნიშვნელოვანია, ევროპულმა კომისიამ მკაფიო პოზიცია გამოხატოს "უსაფუძვლო ბრალდებების მიმართ".

• "ევროპული კომისიის მიერ მკაფიო პოზიციის გამოხატვა არის აუცილებელი პირობა იმისათვის, რომ ქართველ ხალხს ევროპული სტრუქტურების მიმართ უსამართლობის განცდა არ გაუღრმავდეს და ოპოზიციის რადიკალურმა ფრთამ ევროპარლამენტის რეზოლუცია პოლარიზაციის გაღვივებისთვის არ გამოიყენოს".

დეოლიგარქიზაცია: ღარიბაშვილი აღნიშნავს, რომ მთავრობის პოლიტიკური ოპონენტები და ევროპარლამენტში "მათი ლობისტები" ამ ჩანაწერს აქტიურად იყენებენ და აღნიშნავენ, რომ ევროპულმა კომისიამ დეოლიგარქიზაციის დათქმა დოკუმენტში ბიძინა ივანიშვილის ფაქტორის გამო შეიტანა.

• "როგორც უკვე აღვნიშნე, ბიძინა ივანიშვილი ქართულ პოლიტიკასა და მედიაზე არავითარ ფორმალურ თუ არაფორმალურ გავლენას არ ფლობს და ოლიგარქად ვერავითარი სამართლებრივი თუ პოლიტიკური კრიტერიუმით ვერ შეფასდება";
• "აღნიშნულის საპირისპიროდ, საქართველოში არის კრიმინალური წარსულის მქონე რამდენიმე ფინანსურად შეძლებული პირი, რომელიც პოლიტიკასა და მედიაზე აქტიური გავლენით სარგებლობს და ამ გავლენას ოპოზიციის რადიკალური ფრთის სასარგებლოდ იყენებს";
• "მე თქვენ ვერ მოგთხოვთ ამ პირების ოლიგარქებად გამოცხადებას. თუმცა, იმისათვის, რომ ევროპული კომისიის შეფასების დოკუმენტი არ იქნეს გამოყენებული მანიპულაციისა და საქართველოს მმართველობის სისტემის დისკრედიტაციისთვის, ჩემი თხოვნაა, კომისია მკაფიოდ გაემიჯნოს დეოლიგარქიზაციის შესახებ ჩანაწერის პერსონიფიკაციას".

პრემიერი ირწმუნება, რომ ევროპული კომისიის პოზიციის სიცხადე მნიშვნელოვანია, რათა "არ დარჩეს სივრცე სპეკულაციებისთვის".

• მისივე თქმით, ეს მნიშვნელოვანია, რათა ქართულ საზოგადოებაში შეინარჩუნონ მაღალი ნდობა ევროპული სტრუქტურების მიმართ და ხელი შეეწყოს პოლარიზაციის ხარისხის შემცირებას საქართველოში.

გარდა ამისა, დანართის სახით, ღარიბაშილმა ლაიენს 12 ივლისს გამოქვეყნებული წერილიც გაუგზავნა.

• "ვფიქრობ, აღნიშნული წერილი ცხად წარმოდგენას შეგიქმნით იმის შესახებ, თუ რატომ ებრძვის რადიკალური ოპოზიცია ბიძინა ივანიშვილს პოლიტიკიდან მისი სრული დისტანცირების შემდეგაც".