საქართველოში ამერიკის შეერთებული შტატების ელჩის, კელი დეგნანის თქმით, ნებისმიერი განცხადება, რომ აშშ ერეოდა სასამართლო პროცესში, არ არის სიმართლე.

რატომ არის მნიშვნელოვანი: ნიკა გვარამიას საქმის მოსამართლე ლაშა ჩხიკვაძე აცხადებს, რომ განაჩენი გამოცხადების შემდეგ შეხვდა აშშ-ის საელჩოს თანამშრომელს, რომელმაც ჰკითხა საქმის ფაქტობრივი გარემოებები.

  • მოსამართლემ დაადასტურა, რომ საელჩომ ის ნამდვილად ჩახსნა პროგრამიდან, რომლის ფარგლებშიც კვალიფიკაციის ასამაღლებლად ამერიკაში უნდა წასულიყო.

დეგნანის თქმით, წლებია აშშ და საელჩო მუშაობს იმაზე, რომ საქართველოში იყოს დამოუკიდებელი, გამჭვირვალე, მიუკერძოებელი სასამართლო სისტემა.

  • "ეს არის მთავარი ქვაკუთხედი კანონის უზენაესობისთვის, რაზეც ვმუშაობთ და გავაგრძელებთ ამაზე მუშაობას ჩვენს პარტნიორებთან ერთად".
  • "ეს არის მიზანი და ჯანსაღი დემოკრატიის ძალიან მნიშვნელოვანი ნაწილია მიუკერძოებელი, დამოუკიდებელი და გამჭვირვალე სასამართლო სისტემა".

ჩხიკვაძის თქმით, საელჩოს თანამშრომელმა უთხრა, რომ ელჩს აინტერესებდა, რატომ მიიღო მოსამართლემ გამამტყუნებელი განაჩენი ამ საქმეზე და რატომ გამოიყენა სასჯელად თავისუფლების აღკვეთა.

  • მოსამართლეს მიაჩნია, რომ "ეს იყო ანგარიშის მოთხოვნა კონკრეტულ საქმესთან დაკავშირებით".

არქივიდან: 20 მაისს რამდენიმე მედიამ წყაროებზე დაყრდნობით გაავრცელა ინფორმაცია, რომ ჩხიკვაძე საელჩომ ამოაგდო პროგრამიდან, რომლის ფარგლებშიც კვალიფიკაციის ასამაღლებლად აშშ-ში მიდიოდა.

  • 16 მაისს ლაშა ჩხიკვაძემ ნიკა გვარამიას 3 წლითა და 6 თვით პატიმრობა მიუსაჯა და დაუყოვნებლივ დაკავების ბრძანება გასცა.
  • ადგილობრივი არასამთავრობო ორგანიზაციების განცხადებით, ნიკა გვარამიას მიმართ გამოტანილი განაჩენი უკანონო და პოლიტიკურად მოტივირებულია და კრიტიკულ მედიაზე ზეწოლის კიდევ ერთი პრეცედენტია.
  • სახალხო დამცველიც აცხადებს, რომ განაჩენი კანონთან შეუსაბამოა და ემსახურება კრიტიკულ მედიასაშუალებებზე ისეთ ზეწოლას, როგორიც დემოკრატიულ სახელმწიფოში არ ხდება.
  • გვარამიას საქმე დასავლელი პარტნიორების კრიტიკულ განცხადებებსა და რეზოლუციებშიც მოხვდა, სადაც ისინი ხელისუფლებას შესაბამისი რეაგირებისკენ მოუწოდებდნენ.