NDI-ის კვლევით, გამოკითხულთა 78 პროცენტი ფიქრობს, რომ მიუხედავად უვიზო მიმოსვლისა, რიგითი ადამიანები ფინანსურად ვერ გაწვდებიან ევროკავშირში მოგზაურობას. აღნიშნულ მოსაზრებას არ ეთანხმება გამოკითხულთა 14 პროცენტი.

ასევე, გამოკითხულთა 71 პროცენტის აზრით, უვიზო მიმოსვლის შედეგად, მოსახლეობას გაუადვილდება სამედიცინო შემოწმებების მიღება, 70 პროცენტი კი მიიჩნევს, რომ ქართველ სტუდენტებს ევროკავშირის ქვეყნებში სწავლა გაუმარტივდებათ.

კვლევისას გამოკითხულთა 67 პროცენტი დაეთანხმა აზრს, რომ უვიზო მიმოსვლისას საქართველოს მოქალაქეების უმრავლესობა ემიგრაციაში წავა, ხოლო, 49 პროცენტის მოსაზრებით, ევროკავშირის ქვეყნებთან უვიზო მიმოსვლა, გამოიწვევს საქართველოში უცხოელი ლტოლვილების ჩამოსვლას.

კვლევის საველე სამუშაოები NDI-ის დაკვეთით, CRRC-იმ 2017 წლის 7-28 აპრილის პერიოდში ჩაატარა. გამოკითხული 2 493 მოქალაქე წარმომადგენლობითი შერჩევის წესით, მთელი ქვეყნის მასშტაბით (ოკუპირებული ტერიტორიების გარდა) შეირჩნენ და პირისპირ ინტერვიუს სახით გამოკითხეს. კვლევის ცდომილების ზღვარია 2,7 პროცენტი. კვლევა დიდი ბრიტანეთის მთავრობის UK aid-ის ფინანსური მხარდაჭერით ჩატარდა.