"თავი რა დღეში ჩაიგდეს და საქართველოც რა დღეში ჩააგდეს, იმიტომ, რომ ეს ძალიან მძიმე გადაწყვეტილებაა", — ასე ეხმაურება სტრატეგია აღმაშენებლის ლიდერი, გიორგი ვაშაძე ევროპარლამენტის მიერ საქართველოზე რეზოლუციის მიღებას, სადაც ბიძინა ივანიშვილის სანქცირებაზეცაა საუბარი.

ვაშაძე ამბობს, რომ ამ სანქციებით, არა მხოლოდ ივანიშვილი, არამედ საქართველოც დაზიანდება. მისივე თქმით, რეზოლუცია ქვეყნისთვის კანდიდატის სტატუსის მოპოვებას ხელს შეუშლის.

"მე ნაკლებად მაინტერესებს, პერსონალურად, ივანიშვილის, ღარიბაშვილისა და კობახიძის ბედი, მაგრამ დღეს საქართველოს ბედი წყდება. საქართველოს ისტორიული შესაძლებლობა გვაქვს წინ, კანდიდატის სტატუსის და თუ თქვენ მეკითხებით, ეს რეზოლუცია ხელს შეუშლის თუ არა კანდიდატის სტატუსის მოპოვებას — დიახ, ეს ასეა", — განაცხადა მან TV პირველთან.

არსებული ინფორმაციით, ევროპარლამენტმა საქართველოში მედიისა და ჟურნალისტების უსაფრთხო გარემოს შესახებ რეზოლუცია მიიღო, სადაც ბიძინა ივანიშვილისთვის სანქციების დაწესებაზეც არის საუბარი. რეზოლუციას მხარი 308 დეპუტატმა დაუჭირა, 218 კი წინააღმდეგი იყო.

ინფორმაციის გავრცელებას ქართული ოცნების თავმჯდომარის, ირაკლი კობახიძის ბრიფინგი მოჰყვა. კობახიძემ ევროპარლამენტარებს ე.წ ფეიკის მსხვერპლები უწოდა. ასევე, თქვა, რომ რეზოლუციაში არაერთი "ფაქტობრივი უზუსტობა და ტყუილია".

კობახიძემ დოკუმენტის შინაარსიც გააკრიტიკა, ივანიშვილის "მიღწევები" ჩამოთვალა და აღნიშნა, რომ "რეზოლუციას, რომელიც ივანიშვილის სანქცირებას ითხოვს, ჩალის ფასი აქვს". მმართველი პარტიის თავმჯდომარემ თქვა ისიც, რომ საქართველოსთვის, უკრაინისა და მოლდოვასთვის "კანდიდატის სტატუსის მინიჭებას არავითარი პრაქტიკული შედეგი არა აქვს".

კობახიძის განცხადებას უკვე მოჰყვა კრიტიკაც. სახალხო დამცველის, ნინო ლომჯარიას თქმით, ძალიან სუსტია არგუმენტი, რომ ევროპარლამენტარები ფეიკ ნიუსების მსხვერპლი არიან.