ევროკავშირის ლიდერები რუსული ნავთობის იმპორტის ნაწილობრივ აკრძალვაზე შეთანხმდნენ. საერთაშორისო მედიის ცნობით, ევროკავშირის ლიდერების გეგმაა, რომ რუსული ნავთობის იმპორტი წლის ბოლომდე 90%-ით შეამცირონ.

CNN ევროკომისიის პრეზიდენტზე, ურსულა ფონ დერ ლაიენზე დაყრდნობით წერს, რომ აიკრძალება ტანკერებით ნავთობის მიწოდება, ხოლო ამ ეტაპზე, გამონაკლისი იქნება დრუჟბას მილსადენი სამხრეთ სეგმენტისთვის.

ჩრდილოეთ სეგმენტი პოლონეთსა და გერმანიას ემსახურება, რომლებიც, მედიის ცნობით, ემბარგოს დათანხმდნენ. ხოლო სამხრეთ ნაწილი უნგრეთს, სლოვაკეთსა და ჩეხეთის რესპუბლიკას მიემართება. ვონ დერ ლაიენის განცხადებით, გამონაკლისი სწორედ ეს სამხრეთ სეგმენტია, რომელიც რუსული ნავთობის იმპორტის 10%-ს შეადგენს.

"ჩვენ გვაქვს მკაფიო პოლიტიკური განცხადება გერმანიისა და პოლონეთის მხრიდან, რომ ისინი, როგორც სხვები, შეამცირებენ რუსულ ნავთობს წლის ბოლომდე. ჩვენ დავფარავთ რუსული ნავთობის 90%-ს, რომელიც დროის ამ მონაკვეთში თანდათან დასრულდება. რჩება, დაახლოებით, 10 ან 11%, რომელსაც სამხრეთ დრუჟბა ფარავს. ჩვენ ამ დროისთვის, გამონაკლისზე შევთანხმდით", — განაცხადა ლაიენმა.

ლაიენმა დაამატა, რომ ევროკავშირის ლიდერები შეხვედრებს გააგრძელებენ, რათა ნავთობის ემბრაგოს დეტალები და სანქციების ახალი პაკეტის სხვა ნაწილები განიხილონ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში.