უკრაინის რადამ კენჭი უყარა ქვეყანაში საომარი მდგომარეობისა და მობილიზაციის 23 აგვისტომდე გახანგრძლივებას. პარლამენტმა დაამტკიცა პრეზიდენტის ბრძანება, რომლის მიხედვითაც საომარი მდგომარეობა და საყოველთაო მობილიზება 2022 წლის 25 მაისის 05:30 საათიდან გაგრძელდება კიდევ 90 დღით — 23 აგვისტომდე.

პრეზიდენტის წარმომადგენელმა საკონსტიტუციო სასამართლოში, ფედირ ვენისლავსკის განმარტებით, 3 თვით გახანგრძლივების გადაწყვეტილება გამოწვეულია იმით, რომ კონტრშეტევას უფრო მეტი დრო სჭირდება, ვიდრე დაცვას.

"ჩვენ ორჯერ გავაგრძელეთ საომარი მდგომარეობა 24 თებერვლიდან. ახლა ჩვენ გვესმის, რომ მტერი ფოკუსირებულია სიმაგრეების აშენებაზე დროებით კონტროლირებად ტერიტორიებზე. კონტრშეტევა უფრო რთული ამოცანაა, ვიდრე თავდაცვა. ამიტომ, უნდა ვიცოდეთ, რომ უკრაინის მთელი ტერიტორიის გათავისუფლება მომდევნო ერთი თვის განმავლობაში ნაკლებად სავარაუდოა", — თქვა მან.

ვენისლავსკიმ აღნიშნა, რომ უმაღლესი რადა გააუქმებს საომარ მდგომარეობას, თუ უკრაინელი სამხედროები შეძლებენ ტერიტორიების გათავისუფლებას რუსი ოკუპანტებისაგან სამ თვეზე ნაკლებ დროში.