საქართველოს პრემიერმინისტრმა, ირაკლი ღარიბაშვილმა ჩამოთვალა, რა გააკეთეს უკრაინელების დასახმარებლად და ამტკიცებს, რომ "ეს არის მაქსიმუმი, რაც რაც პატარა ქვეყანას შეუძლია". მან ჟურნალისტებს მოუწოდა, რომ ეს "დააფასონ, გაიგონ და მშვიდად იყვნენ".

"რაც შეეხება უკრაინელ ლტოლვილებს, საქართველო, პირველ რიგში, მე მინდა შევახსენო ყველას და მათ შორის, თქვენ, 191 ქვეყანას შორის არის პირველ ადგილზე, რომელმაც ყველაზე მეტი ტვირთი გააგზავნა უკრაინის მოსახლეობისთვის, ხალხისთვის, ეს ერთი.

მეორე, ყველა ის დევნილი, ლტოლვილი, უკრაინიდან ჩამოსული, რომელიც ჩამოსულია საქართველოში და ცხოვრობს აქ, ჩვენ, რაც შეგვიძლია, ვუკეთებთ მაქსიმუმს.

მესამე, დაწყებული ჯანდაცვით, განათლებით — გახსენებთ, რომ მე თავად მოვინახულო უკრაინელი ბავშვების, უკრაინული სექტორი, რომელიც განათლების მინისტრმა შექმნა თბილისში და ახლა ბათუმში აპირებს — ჩვენ, მეგობრებო, ვაკეთებთ მაქსიმუმს, რაც შეუძლია პატარა ქვეყანას, ჩვენი ბიუჯეტით.

ეს არის მაქსიმუმი. ეს არის ჩვეულებრივი მავნებლური, პროვოკაციული შეკითხვები და მე გთხოვთ, იფიქროთ ჩვენი ქვეყნის ინტერესებზე, პირველ რიგში და ეს თქვენი პარტიული ინტერესები და თქვენი საფუძველ მოკლებული ინტერპრეტაციები არ აინტერესებს მოსახლეობას.

ჩვენი ხალხი დაირაზმა მთელი ხალხი, მთავრობის ხელშეწყობით, ყველა ჩართული იყო, მთელი რეგიონები და 550 ტონა ჰუმანიტარული ტვირთი გააგზავნა უკრაინაში, უკრაინელებისთვის. ხალხო, ეს დააფასეთ და გაიგეთ და მშვიდად იყავით ყველანი", — განაცხადა მან.