ლიეტუვის პარლამენტმა რუსეთი ტერორისტულ სახელმწიფოდ აღიარა. სეიმის განცხადებით, კრემლის რეჟიმი უკრაინელი ერის განადგურებას ცდილობს, ამიტომ ასეთი ქმედებები გენოციდად უნდა იქნას აღიარებული, ხოლო რუსეთი არის სახელმწიფო, რომელიც მხარს უჭერს და ახორციელებს ტერორიზმს. პარლამენტმა შესაბამის დადგენილებას მხარი ერთხმად დაუჭირა.

სეიმის თქმით, რუსეთის შეიარაღებულმა ძალებმა და დაქირავებულმა სამხედროებმა ჩაიდინეს მასობრივი სამხედრო დანაშაულები უკრაინის ტერიტორიაზე, განსაკუთრებით ბუჩაში, ირპენში, მარიუპოლში, ბოროდიანკასა და გოსტომელში.

"ლიეტუვის სეიმი აღიარებს რუსეთის ფედერაციის შეიარაღებული ძალების და მისი პოლიტიკური და სამხედრო ხელმძღვანელობის სრულმასშტაბიან შეიარაღებულ აგრესიას უკრაინის წინააღმდეგ, რომელიც დაიწყო 2022 წლის 24 თებერვალს, უკრაინელი ხალხის გენოციდად", — ნათქვამია რეზოლუციაში.

იგი ასევე ხაზს უსვამს, რომ ყველა დამნაშავემ უნდა აგოს პასუხი და საერთაშორისო საზოგადოებამ უნდა შექმნას სპეციალური საერთაშორისო სისხლის სამართლის ტრიბუნალი, რათა გამოიძიოს და შეაფასოს რუსეთის აგრესია სუვერენული უკრაინის წინააღმდეგ. სეიმი მოუწოდებს ქვეყნებს, რომ ტრიბუნალს ჰქონდეს დაპატიმრების საერთაშორისო ორდერის გაცემის უფლებამოსილება.