"ევროპული სწაფვის არარსებობა არ ნიშნავს, რომ რუსეთი წყვეტს ტერიტორიების ოკუპაციას", — ასე უპასუხა პრეზიდენტმა სალომე ზურაბიშვილმა კითხვას არის თუ არა აღმოსავლეთ ქვეყნების მხრიდან ევროკავშირთან ან ნატოსთან დაახლოება რუსეთის მიმართ "პროვოკაცია".

მის თქმით, 2008 წლის რუსეთ-საქართველოს ომმა მხოლოდ დააჩქარა ევროკავშირისა და ნატოსკენ სწრაფვის პროცესი. ამის შესახებ ფრანგულ გამოცემასთან ისაუბრა.

"ამის არასდროს გვჯეროდა: ევროპული სწაფვის არარსებობა არ ნიშნავს იმას, რომ რუსეთი წყვეტს ტერიტორიების ოკუპაციას, ან სხვაგვარად იქცევა. უპირველეს ყოვლისა, ქართველებს სჯერათ, რომ ვერაფერი ვერ შეაცვლევინებს მათ პერსპექტივას. 2008 წლის რუსეთ-საქართველოს ომმა მხოლოდ დააჩქარა ევროკავშირისა და ნატოსკენ სწრაფვის პროცესი. ვიზალიბერალიზაცია, ევროკავშირთან სავაჭრო ურთიერთობები — ძალიან ხელშესახები პროგრესია. იგივე ხდება ნატოსთან მიმართებაში: საქართველო იყო ძალიან აქტიური ავღანეთში, ის იყო ყველაზე მეტად წარმოდგენილი ქვეყანა ერთ მოსახლეზე", —ამბობს ის.

ზურაბიშვილი საუბრობს, რომ "რუსული ცდუნება არ არსებობს". მისი განცხადებით, რუსეთში მხოლოდ ის ქართველები დარჩნენ, ვინც იქ საბჭოთა კავშირის დროს ცხოვრობდნენ და დაბრუნებულთა რამდენიმე ტალღის მიუხედავად, განაგრძეს იქ ცხოვრება, რადგან იქ ოჯახები ჰყავთ და სამსახური აქვთ

"ყოველწლიურად გვაქვს ორი წვრთნა ნატოსთან ეგიდით. ეს ყველაფერი ჩვენი საგარეო პოლიტიკის ნაწილია, ამას არაფერი შეცვლის. რუსული საფრთხეები შეიძლება არსებობდეს, მაგრამ მოსახლეობის 80% მხარს უჭერს ამ ევროპულ ორიენტაციას, რადგან დარწმუნებულია, რომ ეს არის ერთადერთი პერსპექტივა პოლიტიკური სისტემის და შიდა უსაფრთხოების განვითარებისთვის.

რუსული ცდუნება არ არსებობს და ეს ძალიან კარგად ჩანს. ხალხი გამოხატავს უარყოფას: არც ერთი სტუდენტი არ მიდის მოსკოვში სასწავლებლად, ისინი ყველა მიდიან სასწავლებლად ევროპის, ან ამერიკის უნივერსიტეტებში და მთელი ჩვენი მოსახლეობა, რომელიც ლეგალურად თუ არალეგალურად მიდის სამუშაოდ საზღვარგარეთ, ირჩევს ევროპას ან ამერიკას, არავინ იყურება რუსეთისკენ", — თქვა ზურაბიშვილმა.

მან უკრაინის შესახებაც ისაუბრა და თქვა, რომ მთელი მსოფლიო გაოცებულია უკრაინის სამხედრო წინააღმდეგობის უნარით, მათი თავდაცვის ორგანიზებით და მოსახლეობის ერთიანობით.