სახელმწიფო დეპარტამენტის პრესპიკერი, ნედ პრაისი ჰიტლერსა და ზელენსკის შესახებ ლავროვის განცხადებაზე ისრაელის პოზიციას იზიარებს და აცხადებს, რომ ეს იყო რასიზმის, პროპაგანდისა და მზაკვრული ტყუილების ყველაზე დაბალი გამოვლინება.

"როგორც ისრაელის საგარეო საქმეთა მინისტრმა თქვა, ეს კომენტარი იყო მიუტევებელი და აღმაშფოთებელი, ასევე, საშინელი ისტორიული შეცდომა [...] ეს იყო რასიზმის ყველაზე დაბალი ფორმა, ეს იყო პროპაგანდის ყველაზე დაბალი ფორმა, ეს იყო მზაკვრული ტყუილების ყველაზე დაბალი ფორმა", — აღნიშნა მან.

რუსეთის საგარეო საქმეთა მინისტრმა, სერგეი ლავროვმა განაცხადა, რომ ნაცისტ დიქტატორ ადოლფ ჰიტლერს "ებრაული სისხლი ჰქონდა", შესაბამისად ზელენსკის "ნაცისზმს" მისი ებრაული სისხლი არ ცვლის.

ამ განცხადების შემდეგ ისრაელის საგარეო საქმეთა სამინისტრომ რუსეთის ელჩი დაიბარა, ხოლო მინისტრმა განაცხადა, რომ ლავროვის განცხადება საშინელი ისტორიული შეცდომაა და მისგან ბოდიშს ელიან.