საგარეო საქმეთა და უსაფრთხოების პოლიტიკის სფეროში ევროკავშირის უმაღლესი წარმომადგენელი, ჯოზეფ ბორელი აცხადებს, რომ მარიუპოლში ჰუმანიტარული დერეფნები დაუყოვნებლივ უნდა შეიქმნას. მის განცხადებას CNN ავრცელებს.

"უკვე 4 კვირაა, რაც მსოფლიო მოწმეა რუსეთის მიერ მარიუპოლში სასტიკი, უკანონო თავდასხმებისა, რომელიც ქალაქის ფართომასშტაბიან განადგურებას იწვევს, მათ შორის, ჩადენილია სისასტიკეები მშვიდობიანი მოქალაქეების წინააღმდეგ ქალაქის "გათავისუფლების" დამახინჯებული საბაბით", — ამბობს ის.

დღეს ევროპული საბჭოს პრეზიდენტს, შარლ მიშელს სატელეფონო საუბარი ჰქონდა ვლადიმერ პუტინთან, რა დროსაც, მან რუსეთის პრეზიდენტს მოუწოდა, გახსნას დერეფნები მარიუპოლიდან და სხვა ალყაშემორტყმული ქალაქებიდან.

უკრაინის ვიცეპრემიერის, ირინა ვერეშჩუკის განცხადებით, რუსეთს აზოვსტალის შტურმით აღების ეშინია, მაგრამ ხელს უშლის მშვიდობიანი მოსახლეობის ევაკუაციას. მისი თქმით, ამას გამიზნულად აკეთებს. მხოლოდ გუშინ, 21 აპრილს გამოვიდა 4 საევაკუაციო ავტობუსი მარიუპოლის ტერიტორიიდან.

მარიუპოლის მერის, ვადიმ ბოიჩენკოს განცხადებით, ქალაქში მყოფი სამხედროები დანებებას არ აპირებენ. მისი თქმით, ისინი მზად არიან დატოვონ ტერიტორია, მხოლოდ იარაღით ხელში.

მარიუპოლი ომის დაწყების პირველივე დღეებიდან ალყაშია. რუსული დაბომბვების გამო განადგურებულია ქალაქის ინფრასტრუქტურა და დაღუპულია ათასობით მშვიდობიანი მოქალაქე. საოკუპაციო ძალები აბრკოლებენ მწვანე დერეფნების მუშაობას და ჰუმანიტარული ტვირთის შეტანას, კლავენ, აუპატიურებენ და იტაცებენ მოქალაქეებს.

19 აპრილს დე ფაქტო დონეცკის რესპუბლიკამ თქვა, რომ რუსებთან ერთად დაიწყეს შეტევა აზოვსტალზე, სადაც ქალაქის მცველები და მშვიდობიანი მოსახლეობა აფარებს თავს. მანამდე რუსეთის თავდაცვის სამინისტრომ განაცხადა, რომ "წმინდა ჰუმანური პრინციპების ხელმძღვანელობით" კიდევ ერთხელ, აპრილში უკვე მესამედ სთავაზობდნენ მარიუპოლში მყოფ მებრძოლებს ცეცხლის შეწყვეტას და ქალაქის ჩაბარებას. მათ მესამედაც უარი მიიღეს.

20 აპრილს აზოვმა მსოფლიოს მოუწოდა, რომ მესამე სახელმწიფოს ტერიტორიაზე ევაკუაციაში დაეხმარონ. ამავე დღეს ცნობილი გახდა, რომ უკრაინის დელეგაციის წარმომადგენლები, დავით არახამია და მიხაილო პოდოლიაკი მზად არიან, ჩავიდნენ მარიუპოლში, რათა რუსულ მხარესთან სამხედროების ევაკუაციის საკითხი განიხილონ. ზელენსკიმ კი განაცხადა, რომ მზად არის სამხედრო ტყვეები მარიუპოლის მაცხოვრებლებისთვის გაცვალოს.

21 აპრილს სერგეი შოიგუმ ვლადიმერ პუტინს უთხრა, თითქოს მარიუპოლი აიღეს და მხოლოდ აზოვსტალის ინდუსტრიული ზონის შტურმიღა დარჩათ, რისთვისაც 3-4 დღე სჭირდებათ. პუტინმა ეს გეგმა დაიწუნა და ბლოკადის გაგრძელება უბრძანა.

პუტინის ბრძანებას გამოეხმაურა მარიუპოლის მერის მრჩეველი და განაცხადა, რომ ეს ბლოკადაში მყოფი ხალხისთვის არაფერს ცვლის.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში