მოსახლეობა NATO-ში წევრობას კვლავაც აქტიურად უჭერს მხარს

ეროვნულ-დემოკრატიული ინსტიტუტის (NDI) განცხადებით, მოსახლეობა NATO-ში წევრობას კვლავაც აქტიურად უჭერს მხარს. ახალი კვლევის მიხედვით, კითხვაზე, მისაღებია თუ არა საქართველოს მთავრობის გაცხადებული მიზანი საქართველო გახდეს NATO-ს წევრი, მარტში გამოკითხულთა 71% დადებითად პასუხობს. ამასთან, 15%-სთვის ეს მიუღებელია, ხოლო 13% ამბობს, რომ არ იცის.

რაც შეეხება თებერვალში ჩატარებულ კვლევას, NATO-ში გაწევრიანებას გამოკითხულთა 74% უჭერს მხარს, 16%-თვის ეს მიუღებელია, 10%-მა კი არ იცის.

კვლევის მიხედვით, ომის დაწყების შემდეგ, უფრო მეტი ადამიანი ფიქრობს, რომ NATO საქართველოს უსაფრთხოებას უზრუნველყოფს. ამასთან, უმრავლესობას მიაჩნია, რომ NATO-ში გაწევრიანება ტერიტორიული მთლიანობის აღდგენას შეუწყობს ხელს.

NDI-ის კვლევა დიდი ბრიტანეთის მთავრობის UK aid ფინანსური ხელშეწყობით ხორციელდება. კვლევა ჩატარებულია CRRC საქართველოს მიერ. ორგანიზაციის განცხადებით, ანგარიში რუსეთის მიერ უკრაინაში შეჭრამდე დაახლოებით ორი კვირით ადრე (3-15 თებერვალს) და ორი კვირის შემდეგ (9-20 მარტს) ჩატარდა და ქვეყნის წარმომადგენლობით (ოკუპირებული ტერიტორიების გამოკლებით) ორი სატალეფონო გამოკითხვის შედეგებს ემყარება. რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით აარჩიეს. ინტერვიუები ჩატარდა: ქართულ, აზერბაიჯანულ, სომხურ და რუსულ ენებზე.

თებერვლის კვლევაში ჩატარდა 2 036 დასრულებული ინტერვიუ (18% გამოპასუხება AAPOR სტანდარტების მიხედვით). საშუალო ცდომილების ზღვარი - +/- 1,8 პროცენტი. მარტის კვლევაში 2 204 დასრულებული ინტერვიუ (18% გამოპასუხება AAPOR სტანდარტების მიხედვით). საშუალო ცდომილების ზღვარი +/- 1,6 პროცენტია. ცდომილების ზღვარი იცვლება სხვადასხვა კითხვის მიხედვით.

ამავე თემაზე:

ბოლო ამბები:

გირჩევთ