NDI-ს კვლევის მიხედვით, გამოკითხულთა უმრავლესობა — 64% პოლიტიკურად გადაუწყვეტელია, კერძოდ, მოსახლეობის უმრავლესობამ არ იცის ან არ ასახელებს იმ პარტიას, რომელიც მის შეხედულებებთან ყველაზე ახლოს დგას.

რაც შეეხება პარტიებს, კითხვაზე, თუ რომელი პარტია დგას მათ შეხედულებებთან ყველაზე ახლოს, გამოკითხულთა 22% ქართულ ოცნებას ასახელებს, 7% ნაციონალურ მოძრაობას, 6% სხვა პარტიას.

ფოტო: NDI

კვლევაში ვკითხულობთ, რომ კონკრეტული პარტია გამოკითხულთა 35%-მა პროცენტმა დაასახელა, პარტიების მხარდაჭერის ინდივიდუალური მაჩვენებლები კი იმენად დაბალია, რომ არჩევნების შედეგების გამოსაცნობად ვერ გამოდგება.

NDI-ის კვლევა დიდი ბრიტანეთის მთავრობის UK aid ფინანსური ხელშეწყობით ხორციელდება. კვლევა ჩატარებულია CRRC საქართველოს მიერ.

ორგანიზაციის განცხადებით, ანგარიში რუსეთის მიერ უკრაინაში შეჭრამდე დაახლოებით ორი კვირით ადრე (3-15 თებერვალს) და ორი კვირის შემდეგ (9-20 მარტს) ჩატარდა და ქვეყნის წარმომადგენლობით (ოკუპირებილი ტერიტორიების გამოკლებით) ორი სატალეფონო გამოკითხვის შედეგებს ემყარება. რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით აარჩიეს. ინტერვიუები ჩატარდა: ქართულ, აზერბაიჯანულ, სომხურ და რუსულ ენებზე.

თებერვლის კვლევაში ჩატარდა 2 036 დასრულებული ინტერვიუ (18% გამოპასუხება AAPOR სტანდარტების მიხედვით). საშუალო ცდომილების ზღვარი - +/- 1.8 პროცენტი. მარტის კვლევაში 2 204 დასრულებული ინტერვიუ (18% გამოპასუხება AAPOR სტანდარტების მიხედვით). საშუალო ცდომილების ზღვარი +/- 1.6 პროცენტია. ცდომილების ზღვარი იცვლება სხვადასხვა კითხვის მიხედვით.