საქართველოში უკრაინის საქმეთა დროებითი რწმუნებულის, ანდრეი კასინოვის განცხადებით, უკრაინა ყველაფერს გააკეთებს, რათა მარიუპოლის თითოეული მოქალაქე გადარჩეს. მისი თქმით, ოკუპანტები ქალაქის დაბომბვას აგრძელებენ, ამიტომ უნდა დაელოდონ, რათა ნახონ, როგორც განხორციელდება ჰუმანიტარული დერეფნების გახსნა.

"მარიუპოლის ბლოკადის დღიდან უკრაინა ითხოვს ჰუმანიტარული დერეფნის გახსნას, დღეს გავიგეთ, რომ ჰუმანიტარული დერეფანი უნდა მოეწყოს, მაგრამ ვიცით ისიც, თუ რის ფასად დაგვიჯდება ეს. მტერი მაინც აგრძელებს ქალაქის დაბომბვას, ამიტომაც, მოდით, დაველოდოთ და ვნახოთ, როგორ განხორციელდება ჰუმანიტარული დერეფნის გახსნა.

პრეზიდენტი ზელენსკი ყველაფერს აკეთებს, რომ გადაარჩინოს ყველა მოქალაქე, ვინაიდან, თითოეულ ადამიანს აქვს დიდი ფასი. უკრაინა არ დაიშურებს ძალისხმევას, რომ მარიუპოლის მოსახლეობა გადარჩეს", — აღნიშნა მან ტელეკომპანია ფორმულასთვის მიცემულ ინტერვიუში.

მან, ასევე, ისაუბრა ჰუმანიტარულ სიტუაციაზე და აღნიშნა, რომ ახლა პარტნიორი ქვეყნების მხარდაჭერა ძალიან მნიშვნელოვანია, კასინოვის განცხადებით, ქვეყანაში სიტუაცია არასახარბიელოა, რადგან რუსები კრიტიკული ინფრასტრუქტურისა და ტექნიკურ-მატერიალური ბაზის განადგურებას აგრძელებენ.

"ჰუმანიტარული სიტუაცია არასახარბიელოა, მტერი აგრძელებს კრიტიკული ინფრასტრუქტურისა და ყველა ტექნიკურ-მატერიალური ბაზის განადგურებას, ოკუპანტი ანადგურებს ჩვენს მიწას, რომ ის გამოუსადეგარი იყოს მომავალში. მარტივად რომ აგიხსნათ, როგორია ჰუმანიტარული მდგომარეობა, ერთ მაგალითს მოგიყვანთ.

ავიღოთ ლვოვი — ქალაქის მერის ინფორმაციით, ლვოვის ოლქში ამ დროისთვის 200 000 დევნილი იმყოფება, ამ ადამიანების შესანახად დღეში იხარჯება მილიონ დოლარზე მეტი. უნდა აღვნიშნოთ, რომ ჰუმანიტარული დახმარება, რომელიც უკრაინის ფარგლებს გარედან შემოდის, ძალიან მნიშვნელოვანია", — თქვა მან [ფორმულას თარგმანი],

მისივე თქმით, იმის ფონზე, რომ რუსეთმა ომის მეორე ფაზა დაიწყო, ჰუმანიტარული კრიზისი კიდევ უფრო დამწვავდა, შესაბამისად, გაიზარდა დახმარების საჭიროება. მან აღნიშნა, რომ საქართველოს ამ დროისთვის 970 ტონა ჰუმანიტარული დახმარება აქვს უკრაინაში გაგზავნილი, რისთვისაც უკრაინის წარმომადგენელ

"ჩვენი მონაცემებით, საქართველოდან უკრაინაში გაგზავნილია 970 ტონა ჰუმანიტარული დახმარება, ეს ტვირთი 4 თვითმფრინავით და 52 სატვირთო ავტომობილით გაიგზავნა, როგორც იცით, საქართველოს წითელმა ჯვარმა უკრაინის წითელ ჯვარს 1 300 000 დოლარი და 800 ტონა ჰუმანიტარული ტვირთი გაუგზავნა, ასევე, თბილისის მერიამაც შემოწირულობებით უკრაინისთვის მილიონ ნახევარი ლარი შეაგროვა. მერიამ ასევე 80 ტონა ჰუმანიტარული ტვირთი გაგზავნა ჩემს ქვეყანაში", — განაცხადა მან.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში