კრემლის პრესსპიკერის, დმიტრი პესკოვის განცხადებით, ტყვეების გაცვლაზე უკრაინის რადას პრორუსი დეპუტატის, ვიქტორ მედვედჩუკის ვიდეო ნახეს, თუმცა ამ ეტაპზე რეაქცია არ აქვთ. მის კომენტარს რუსული სახელმწიფო მედია, TASS ავრცელებს.

"ვნახეთ [მედვედჩუკის ვიდეო], ამ ეტაპზე არანაირი რეაქცია", — განაცხადა მან.

18 აპრილს უკრაინის რადას პრორუსი დეპუტატის, ვიქტორ მედვედჩუკის ვიდეომიმართვა გავრცელდა, სადაც ის ვოლოდიმირ ზელენსკისა და ვლადიმერ პუტინს სთხოვს, გაცვალონ მარიუპოლის მოსახლეობასა და მცველებში.

სახელმწიფო ღალატში ბრალდებული, გაქცეული პრორუსი დეპუტატი უკრაინაში 12 აპრილს დააკავეს. როგორც უსაფრთხოების სამსახურში აცხადებდნენ, მედვედჩუკს უკრაინის შეიარაღებული ძალების ფორმა ეცვა, რათა შენიღბულიყო. რუსეთის პრეზიდენტი, ვლადიმერ პუტინი მედვედჩუკის შვილის ნათლიაა.

უკრაინული მედიების ცნობით, პოლიტიკოსი ღალატშია ბრალდებული და რუსეთის შეჭრამდე ის შინაპატიმრობაში იმყოფებოდა. თავდასხმის წინა დღეს გავრცელდა ინფორმაცია, რომ მისი ცოლი ბელარუსში გაიქცა, შემდეგ კი შინაპატიმრობიდან მედვედჩუკიც გაიქცა.

16 აპრილს მედვედჩუკს ლვოვის ლიჩაკოვის რაიონულმა სასამართლომ აღკვეთის ღონისძიების სახით პატიმრობა შეუფარდა.