საქართველოს პარლამენტის თავმჯდომარემ, შალვა პაპუაშვილმა უკრაინაში ვიზიტის დროს განაცხადა, რომ იქ ომის დანაშაულებია ჩადენილი. მის კომენტარს ტელეკომპანია ფორმულა ავრცელებს.

"საქართველო იყო ერთ-ერთი თანაავტორი საერთაშორისო სასამართლოში შეტანილი საჩივრის და რაც ჩვენ აქ ვიხილეთ, რა თქმა უნდა, ცდება ომის ყველა კანონის ჩარჩოებს და ჩვენ ვხედავთ, რომ აქ ომის დანაშაულებია ჩადენილი", — აღნიშნა მან. [ფორმულას თარგმანი].

საქართველოს საპარლამენტო დელეგაცია დღეს უკრაინაში ვიზიტით იმყოფება. რადას თავმჯდომარესთან, რუსლან სტეფანჩუკთან შეხვედრის შემდეგ, პაპუაშვილმა განაცხადა, რომ "სიტყვებით შეუძლებელია იმის გამოხატვა", რაც იქ იხილეს. პაპუაშვილმა უკრაინაში ვიზიტზე თქვა ისიც, რომ "ხალხების სიახლოვის გათვალისწინებით სხვანაირად არც" შეეძლოთ.

შეხვედრის შემდეგ კომენტარი გააკეთა სტეფანჩუკმაც და აღნიშნა, რომ პაპუაშვილთან აგრესორი ქვეყნის წინააღმდეგ სანქციების დაწესების აუცილებლობა განიხილა. ამასთან, უკრაინის რადას ცნობით, პაპუაშვილმა კოლეგა დაარწმუნა, რომ საქართველო რუსეთს არანაირად არ დაეხმარება.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში