უკრაინის პრეზიდენტი, ვოლოდიმირ ზელენსკი მსოფლიოს დახმრებას სთხოვს და იმ სამხედრო ტექნიკის სიას აქვეყნებს, რომელიც უკრაინას ომის შესაჩერებლად სჭირდება. მისი თქმით, სასწრაფოდ სჭირდებათ მძიმე არტილერია, ჯავშანტექნიკა, საჰაერო თავდაცვის სისტემები და თვითმფრინავები.

"რუსული აგრესიისგან მსოფლიოს გმირულად დაცვის გასაგრძელებლად, უკრაინას სჭირდება იარაღის კონკრეტული სია. მივმართავ მთელი მსოფლიოს მოქალაქეებს, დაეხმარეთ თქვენს მთავრობებს, პრეზიდენტის ადმინისტრაციას და თქვენი ქვეყნების ლიდერებს გადასცენ უკრაინას რეალური საჭიროებები, რაც ხელს შეუწყობს ომის შეჩერებას. სასწრაფოდ გვჭირდება მძიმე არტილერია, მძიმე ჯავშანტექნიკა, საჰაერო თავდაცვის სისტემები და თვითმფრინავები", — ამბობს ის.

რას ითხოვს ზელენსკი:

  • საარტილერიო ნაწილები და საბრძოლო მასალა;
  • რაც შეიძლება მეტი საარტილერიო ჭურვი;
  • მრავალჯერადი რაკეტების გაშვების სისტემა: გრადი, ურაგანი ან ამერიკული M142 HIMARS;
  • APC-ები (ჯავშანმატარებლები, ქვეითთა საბრძოლო მანქანები და ა.შ.);
  • ტანკები (T-72, ამერიკული ან გერმანული ანალოგი);
  • საჰაერო თავდაცვის სისტემები (S-300, BUK ან მსგავსი თანამედროვე დასავლური საჰაერო თავდაცვის სისტემები);
  • საბრძოლო თვითმფრინავი.

ზელენსკის თქმით, სხვადასხვა ექსპერტებმა განაცხადეს, რომ რუსეთის უკრაინაში შეჭრის შემთხვევაში, უკრაინა კვირაზე მეტ ხანს ვერ გაძლებდა. თუმცა, უკრაინამ არა მარტო მოახერხა რუსული არმიის შეჩერება, არამედ მათ უკან დაახევინეს, მაგრამ ომის დასრულება შორსაა. მისივე თქმით ეს მხოლოდ პირველი ტური იყო.